Igishushanyo mbonera cy’inyubako nshya ya ICK.

Mu muhango wo kwizihiza isabukuru y’imyaka icumi iri shuri rimaze rishinzwe, tariki 17/03/2013, nibwo minisitiri w’uburezi Vicent Biruta n’umushumba Gatolika wa diyoseze ya Kabgayi Smaragde Mbonyintege, bashyizeho ibuye ry’ifatizo ku hazubakwa iri gorofa.

Iri gorofa rijyiye kubakwa rikazaba rifite amagorofa atanu, rizaba ririmo amashuri n’amabiro bya rino shuri.

Musenyeri Mbonyintege yatangaje ko iri shuri ryubatswe nyuma ya Jenoside yakorewe Abatutsi kugira ngo bafashe igihugu kwiyubaka no kuzamura Abanyarwanda bari barahuye n’ibibazo byinshi by’ingume.

Dr. Vincent Biruta Minisitiri w’uburezi ashyira ibuye ry’ifatizo ahazubakwa inyubako nshya ya ICK.

Minisiri Biruta yasabye abarangiza muri iri shuri ko bajya bagaragaza umuhate wo kugira uruhare mu kuzamura igihugu cyabo.

Kugeza ubu, abarenga 800 bamaze kuhavana impamyabumenyi ya Kaminuza mu mashami atatu ahaboneka nk’ishami ry’Itangazamakuru n’itumanaho, ishami ry’Imbonezamubano, Icungamari n’Ubukungu ndetse n’ishami ry’Iterambere.

Mu busanzwe ishuri rikuru ICK rifite inyubako zigawa na benshi nk’ishuri rikuru kuko bavuga ko ritajyanye n’igihe u Rwanda rugezemo.

Aha bamwe bakaba bavuga ko bigoye kumva ko iri shuri ryaba ritanga uburezi bufite ireme kubera ahantu rikorere uburyo hameze.

Musenyeri Smaragde uyobora Diyoseze ya Kabgayi, Minisitiri w’uburezi, Dr Vincent Biruta n’umuyobozi w’akarere ka Muhanga, Yvonne Mutakwasuku.

Uwitwa Kanyange, umwe mubo twaganiriye nawe asanga kuba inyubako z’iri shuri zitajyanye n’igihe cyane ko nta n’umuturirwa n’umwe urimo bishobora kuriha isura itari nziza.

Ati: “iyo ugeze muri ICK ntiwamenya ko ari kaminuza, n’abahiga sinkeka ko iyo bahinjiye bumva biga muri kaminuza yagirango ni secondaire”.

Gerard GITOLI Mbabazi