Abanyeshuri 51,851 batangiranye nacyo nibo bazahabwa izi mpamyabushobozi, harimo 15,598 basoje amasomo yabo mu 2011, abandi 16, 538 basoje amasomo yabo mu 2012 n’abandi 19,715 bayasoje 2013, nk’uko umuyobozi w’iki kigo, Jerome Gasana, yabitangaje ubwo bashyikirizaga izi mpamyabushobozi abayobozi b’ibigo, kuri uyu wa kabiri tariki 30/12/2014.

Umuyobozi wa WDA, Jerome Gasana, yerekana ibimenyetso bigize impamyabushobozi zahawe abize imyuga n’ubumenyingiro.

Yagize ati “Twatinze kuzitanga kuko twagerageje gukora ibishoboka kugira ngo dukoreshe ibimenyetso bitandukanye byatuma zitaziganwa. Twizera ko tekinoloji ishoboka yose ubu twayikoresheje kuko ni nabyo byadutindije kugira ngo tubanze twige ubwo buhanga bwose”.

Gasana yatangaje ko n’ubwo aba banyeshuri bari batarazibona ariko bari barahawe ibyangombwa byabafashaga mu kuzikoresha bashaka imirimo. Anaboneraho gutangaza ibyavuye mu bushakashatsi baheruka gukora ku bize imyuga bishimirwa ku isoko ry’umurimo.

Umuyobozi wa DWA ashyikiriza impamyabushobozi umwe mu bize imyuga.

Mu mibare y’agateganyo bafite ni uko abakoresha barenga ikigero cya 70% bishimira akazi abanyeshuri bize mu mashuri y’ubumenyingiro n’imyuga bakora, naho abandi banyeshuri barenga ikigero cya 30% bakaba babona akazi mbere y’amezi atandatu.

Maurice Gasana Mbonimana warangije mu cyiciro cya 2011 akaba nawe yahawe impamyabushobozi ye, yatangaje ko bizamufungurira amarembo yo guhangana inyuma y’imipaka yo hanze y’u Rwanda.

Aba bitabiriye umuhango wo gutanga impamyabushobozi izabo bahise bazitahana.

Ati “Ntago ubumenyi bwarangirira hano mu Rwanda gusa, ni ngombwa ko tugira ibyangombwa bifite ubuziranenge tukabasha kugera ku yandi masoko. Kuri njye iyi ni intambwe nini itewe biradushimishije”.

Yakomeje asaba WDA kubakorera ubuvugizi mu gushyiraho amashyirahamwe ajyanye n’ibyo bize n’ibyo bakora, kugira ngo ayo mashyirahamwe ajye abakorera ubuvugizi anunganire Leta mu kurenga ibikenewe mu bakora ibijyanye n’imyuga n’ubumenyi ngiro.

Umwe mu bakobwa bize imyuga n’ubumenyingiro yerekana impamyabushobozi ye.

Emmanuel N. Hitimana