Uwo muganda waranzwe no gusukura ahazubakwa amacumbi y’abanyeshuri ndetse n’ahazubakwa inyubako zitandukanye icyo kigo kizubaka mu minsi iri imbere dore ko hari hararengewe n’ibihuru.

Kuza gukorera umuganda mu ishuri rya TSS Nyamata bigamije ibintu bitatu: icya mbere ni ugushimira icyo kigo ko cyabashije kwitwara neza mu bizamini bya Leta bisoza amashuri yisumbuye, icya kabiri akaba kubasaba gukomeza uwo murego ndetse no kumenyana b’abanyeshuri ndetse no gusabana nabo nk’uko byatangajwe n’umuyobozi mukuru wa DWA, Gasana Jerome.

Abakozi ba WDA bishimiye uwo muganda bakoraga ku kigo TSS Nyamata.

Yagize ati: “ ntitwifuza ko ingufu mwakoresheje ubushije zigabanuka, ikindi kandi ndabashishikariza ko umunyeshuri urangiza amasomo y’ubumenyi ngiro agomba gutandukana n’abandi. Turashaka ko nimurangiza kwiga mugomba kugenda mutajya gusaba amazu ahubwo muva hano mujya kwihangira imirimo mushinga ibigo biri mu mazina yanyu”.

Gasana yabwiye abo banyeshuri ko bazabereka ibisabwa kugirango umuntu atangire umushinga ndetse bakanabahuza n’abafite amafaranga, kandi ko batagomba kureba ku isoko ryo mu Rwanda ahubwo bagomba kureba isoko ryo ku isi yose kuko ubu ryadutse.

Sebahana John, umuyobozi w’ikigo TSS Nyamata, avuga ko kuba abakozi baje kwifatanya nabo mu muganda bibahaye ingufu ndetse akaba yizera ko ibibazo biri muri icyo kigo bagaragarijwe bigiye gukemuka.

Abaturage nabo bari baje kwifatanya n’abakozi ba WDA n’abanyeshuri ba TSS Nyamata mu muganda.

Yabisobanuye muri aya magambo “turamutse tubonye amacumbi byakemura ikibazo cy’abanyeshuri biga bataha banze y’ikigo kuko amacumbi ari kure ugasanga bibangamira imyigire y’abana kuko hari n’abatinya kugaruka mu kigo gusubira mu masomo nimugoroba batinya ijoro”.

Avuga ko ikigiye kwihutirwa ari ukubaka amacumbi y’abakobwa kubera umutekano wabo, ubushobozi bwaboneka hakubakwa n’ayabahungu.
Umwe mu banyeshuri witwa Nyiransabimana Gesele wiga mu mwaka wa 6 muri Computer Electronics avuga ko nibaramuka bubakiwe amacumbi bizabafasha kwiga neza kuko bibarushya gukora urugendo.

Yagize ati “kuba baje kwifatanya natwe bitugaragariza ko badukunze kandi natwe ntituzabatererana mu mwigire yacu, ariko nituramuka tubonye amacumbi hano bizarushaho kuba byiza dore ko muri iki gihe cy’imvura hari bamwe banga kuza kwiga kubera gutinya imvura n’icyondo”.

Umuyobozi wa WDA aganira n’abanyeshuri ba TSS Nyamata nyuma y’umuganda rusange.

Ikigo cya TSS Nyamata gifite abanyeshuri bagera kuri 714, umuganda wakozwe wahawe agaciro karenga amafaranga ibihumbi 980.

Egide Kayiranga