Insakaza mashusho hamwe na decodeur n’ ifatabuguzi rya DSTV ku mwaka wose nibyo byahawe iki kigo. Iyi nsakazamashusho ikoresha uburyo bwa digital, bifite agaciro kagera kuri miliyoni 1.7 by’ amafaranga y’ u Rwanda.

Abanyeshuri bakira television bahawe na Télé 10 n’ Imbuto Faundation.

Abanyeshuri biga muri iki kigo batangaje ko bagiye gukoresha iki gikoresho mu kwiyungura ubumenyi ariko no kwidagadura ngo ntibizasigara.

Kuba iki kigo cyaratoranyijwe mu guhabwa ibi bikoresho, ni uko kigerageza gushimangira ireme ry’ uburezi, nk’uko byatangajwe na Kabiligi Clément, ashinzwe gahunda z’ uburezi mu muryango Imbuto Foundation tariki ya 31/1/2014.

Gatera Théophile, ayobora iki kigo cy’ amashuri yisumbuye cya Murama, atangaza ko iri reme ry’ uburezi rizakomeza gushimangirwa kandi ko ibikoresho bahawe bizanafasha abarezi kwiyungura ubumenyi mbere yo kubugeza ku banyeshuri.

Abanyeshuri bagaragaje ibyinshimo byinshi mu kwakira iyi television.

Uwari uhagarariye Télé 10, Musore Thierry, yavuze ko bazakomeza gutera inkunga ibigo by’ amashuri babagezaho Télévision na décodeur nk’ uburyo bw’ imfashanyigisho mu mashuri.

Ikigo cy’ amashuri kibaye icya 3 mu gihugu mu kugezwamo ibi bikoresho , nyuma ya G.S St Aloys I Rwamagana na College Sainte Marie mu Karere ka Karongi.

Eric Muvara