Madame Jeannette Kagame hamwe n’abana barangije ingando

Hari mu muhango wo gusoza ingando abana 681 bamazemo iminsi itatu mu rwunge rw’amashuri Mater Dei Nyanza, mu karere ka Nyanza, umuhango wabaye kuri uyu wa gatatu tariki 5 Ukuboza 2018.

Izi ngando ngaruka mwaka zihuza abanyeshuri biga mu mashuri yisumbuye bafashwa n’umuryango Imbuto Foundation, zikaba buri kimwe mu biruhuko bisoza umwaka.

Kugira uruhare mu guhindura imibereho y’abanyeshuri bagenzi babo, imiryango yabo ndetse n’abaturanyi muri rusange, ni undi mukoro ndetse uzajya unagenderwaho mu kugena abana bakomeza gufashwa na Imbuto Foundation abari muri izi ngando bahawe.

Madame Jeannette Kagame yahaye abana b’abakobwa inama z’uko bakwitwara mu buzima

Aba banyeshuri basabwe kugira uruhare mu bikorwa binyuranye, ariko cyane cyane bakibanda ku byugarije abaturage muri rusange, birimo icy’imirire mibi ikigaragara ku bana, icy’isuku nke ikigaragara mu miryango n’ibindi.

Madamu Jeannette Kagame kandi yongeye gusaba aba bana kwirinda gukoresha amavuta ahindura uruhu.

Yagize ati: ”Mwa bana mwe muri beza ntimukeneye ayo mavuta”.

Ubwo yasozaga izi ngando Madamu Jeannette Kagame yongeye kwibutsa aba banyeshuri ko nibita ku biganiro bahawe muri uyu mwaka, uruhare rwa buri wese rukagaragara, bizageza abanyarwanda ku iteramebre rirambye kandi ryihuse, kuko aribo ubwabo bagomba kwishakamo ibisubizo.

Madame Jeannette Kagame

By’umwihariko ariko yahaye aba banyeshuri umukoro wo guhangana n’ikibazo cy’inda z’imburagihe mu bana b’abangavu ndetse n’icy’ubwandu bwa virusi itera sida.

Ati: ”Ndifuza kandi no kubaha imikoro, umwe muri yo ukaba ari ugukomeza gutekereza ku mubare w’abangavu baterwa inda imburagihe, turebe icyo twakora ngo habeho impinduka.

Ibijyanye n’ubwandu bwa sida byo nta gihe umuntu abivuga bihagije, nagirango mbisubiremo. Muzi ko ikerekezo ari uko muri 2030 dushaka ko sida izaba amateka. Nta kuntu rero twabigeraho twebwe, mwebwe tutabigizemo uruhare.”

Aba banyeshuri kandi batangaza ko ibyo basabwa bagiye kubishyira mu bikorwa kuko nabo batewe ishema no kugira uruhare mu mpinduka nziza z’umuryango nyarwanda.

Mugisha Ambroise wiga mu rwunge rw’amashuri indatwa n’inkesha ati: ”Ni byiza gufasha abaturage kugirango biteze imbere mbese duhindure imibereho yabo. Turabyiteguye rero gutanga umusanzu wacu”.

Hatanzwe ibiganiro bitandukanye kandi byanyuze urubyiruko rwitabiriye iki gikorwa

Biteganyijwe ko guhera mu mwaka utaha aba bana bazatangira kujya batanga raporo ku bikorwa nk’ibi bakoze, ndetse zikazaherwaho mu kugena abakomeza gufashwa n’umuryango Imbuto Foundation, naho abatarabyubahirije bakazakurwa ku rutonde rw’abafashwa.

Kuva umuryango Imbuto Foundation watangira gahunda yo gufasha abana b’abahanga mu ishuri ariko baturuka mu miryango ikennye,hamaze gufasha abarenga ibihumbi 8.

Kureba andi mafoto mesnhi y’iki gikorwa kanda AHA

MENYA UMWANDITSI

Charles Ruzindana

Umunyamakuru

@ CharlesRUZINDA2

Reba inkuru zose nanditse ( 672 )