Yemerewe kwiga muri kaminuza yose ashaka ku isi

Uyu munyeshuri yakoze porogaramu ifasha mu gusaba serivisi z’umutekano w’abanyeshuri cyangwa abarwayi kwa muganga, ikaba yaramuritswe mu marushanwa y’udushya mu burezi yitabiriwe n’abanyeshuri.

Iyo porogaramu yegukanye igihembo harimo no kwemerera umunyeshuri wayikoze kuzajya kwiga muri kaminuza ashaka narangiza amashuri yisumbuye.

Mugiraneza w’imyaka 19 avuka mu Karere ka Nyamasheke, akaba yarashoboye gukora iyi porogaramu abihereye ku banyeshuri bigana basohotse ikigo mu ijoro ubuyobozi bukabirukana.

Agira ati "Natekereje gukora porogaramu ituma abanyeshuri batagomba gusohoka ikigo bakaba bakwirukanwa, kuko yo igenzura umuntu wegereye umuryango mu gihe abandi banyeshuri baryamye, igahita ihamagara umuyobozi agahagarika umunyeshuri atarasohoka ngo yirukanwe".

Akomeza agira ati "Mu bushakashatsi nakomeje gukora rero nasanze ishobora no gukoreshwa kwa muganga no mu bindi bikorwa mu gusaba serivisi zihuse, aho umurwayi akanda ku kantu kari ku gitanda mu gihe akeneye muganga igahita ihamagara muganga akaza kureba umurwayi".

Mugiraneza avuga ko nubwo ategereje gukora ikizamini gisoza amasomo arangiza icyiciro cy’amashuri yisumbuye ngo yifuza gukomereza mu gihugu cy’u Bwongereza kugira ngo anononsore ubushakashatsi yatangiye.

Ati "Ndabizi ko nemerewe kujya kwiga aho nshaka, gusa njye numva nazajya mu gihugu cy’u Bwongereza kuko bigisha mu Cyongereza nk’ururimi nsanzwe nkoresha, ikindi ni igihugu cyateye imbere mu ikoranabuhanga".

Mugiraneza wiga mu mwaka wa gatandatu mu cyahoze ari ‘Mechanique automobile’, avuga ko n’ubu afite ubundi bushakashatsi yatangiye bwo gukora akadege gato kajyana imizigo.

Umuyobozi wa IPRC Karongi Ing. Paul Umukunzi, avuga ko iki kigo gifasha abakigamo gukora ubushakashatsi ndetse ngo n’iyo barangije bemererwa kugaruka gukoresha ibikoresho byo mu kigo kugira ngo ubushakashatsi bwabo bugerweho.

MENYA UMWANDITSI

Sylidio Sebuharara

Umunyamakuru

@ sebuharara

Reba inkuru zose nanditse ( 1631 )