Kuri ubu nta mubare uzwi w’abatewe izo nda ariko abanyeshuri batwite bagaragara hamwe na hamwe muri ako karere.

Abana b’abanyeshuri bakunze guterwa inda zitateguwe ni abiga mu mashuri y’uburezi bw’ibanze bw’imyaka 12 (12YBE). Mu bigo bimwe by’ayo mashuri ushobora kuhasanga abanyeshuri barenze umwe batwite.

Ubuyobozi bw’Akarere ka Burera buvuga ko ikibazo cy’abo bana baterwa inda gihangayikishije. Ariko bukavuga ko kimwe mu bisubizo byacyo ari ukunoza gahunda yo kugaburira abana ku ishuri (School Feeding), iri muri ibyo bigo.

Zaraduhaye Joseph, umuyobozi wungirije w’Akarere ka Burera ushinzwe iterambere ry’ubukungu, avuga ko abo bana b’abanyeshuri baterwa izo nda kubera ingendo bakora bajya ndetse banava ku ishuri.

Muri izo ngendo ngo niho bahura n’ababashuka, kubera no gusonza bakemera kuryamana nabo. Akomeza abwira abanyaburera ko “School Feeding” ikozwe neza, abana bose bakajya barira ku ishuri, byakoroha kubagenzura bityo inda zitateguwe zikagabanuka ndetse zikanacika.

Agira ati “Hari imirenge bagiye bakora amatsinda neza, ababyeyi bakabihagurukira bakavugana n’ubuyobozi bw’ikigo kuburyo umwana agira igihe cyo kwiga n’igihe cyo gutaha, kumugenzura bikaba byoroshye…umuntu ufite umwana wiga amenye ko agomba kumushakira uko yagaburirwa.”

Nubwo uyu muyobozi avuga ibi ariko, hari bamwe mu banyeshuri batabasha kurira ku ishuri kubera kubura amafaranga y’u Rwanda 250 yo kwishyura ifunguro, bakaba n’ubundi bahura n’ababashukisha ibyo kurya.

Manishimwe Claudine, wiga mu rwunge rw’amashuri rwa Butete, asaba ko Leta yafasha abana b’abakene ikajya ibatangira amafaranga yo kurya ku ishuri.

Ati “Nifuza ko abana barihirwa mitiweri babafasha nabo bakazajya basangira n’abandi ku ishuri.”

Mu myaka yatambutse nabwo mu karere ka Burera hagiye hagaragara abana b’abanyeshuri batewe inda zitateguwe. Nko muri 2013 hamenyekanye umunani bazitewe n’abarimu babigisha, abo barimu bashyikirizwa ubutabera.

Norbert NIYIZURUGERO