Ishuri ribanza rya Bugera (Bugera Primary School) ryatangiye kwigirwamo ku wa 18 Mutarama 2021, rikaba rifite abanyeshuri 862, ryubatswe mu rwego rwo kugabanya ubucicike n’ingendo abanyeshuri bakoraga bajya kwiga ku ishuri ribanza rya Remera na GS Ndekwe.

Umuyobozi w’iryo shuri, Murorunkwere Béatrice, avuga ko gahunda yo kugaburira abanyeshuri ku ishuri yagezweho 100%, kuko bose bahafatira ifunguro.

Avuga ko kugira ngo bikunde ari uko ababyeyi badafite amikoro bahabwa akazi mu mirima y’ishuri, abandi bakazana ibiribwa, abafite ubushobozi bakaba aribo bishyura amafaranga.

Ati “Umwana azana amafaranga, undi akazana ibiribwa hanyuma ababyeyi batishoboye ntitubaka amafaranga ahubwo tubaha akazi mu mirima y’ishuri, abana babo bagahabwa ibiryo. Buri muntu mu bushobozi bwe azana icyo ashoboye kandi byarakunze.”

Ikindi ni uko abana biga mu mashuri y’incuke bahabwa igikoma, kuko bo ifunguro barifatira iwabo.

Buri mubyeyi ufite umwana mu mashuri yo mu Murenge wa Remera, asabwa amafaranga 2,400 ku kwezi y’ifunguro ry’umwana.

Meya Niyonagira avuga ko gufatira amafunguro ku ishuri uretse kuba bituma abana bakura neza, binabarinda guta amashuri.

Ati “Kugeza ubu mu mashuri abanza, ababyeyi bishyura ni 47%, biracyari hasi ariko turacyakomeje ubukangurambaga, mu gihe mu yisumbuye aho gahunda yatangiriye, ho bimaze gufata umurongo uko biri, kuko bari hejuru ya 74%. Turacyafite ubukangurambaga kuko hiyongereyeho abana bato ariko dufite ikizere ko bizazamuka.”

Avuga ko ubukangurambaga bukorwa ababyeyi bibutswa inshingano bafite, abadafite amikoro bakegera ibigo by’amashuri bagahabwa imirimo isimbura amafaranga bagatanze, ariko n’abafite ibiribwa bakaba aribyo batanga.

Asaba abaturage n’abayobozi mu nzego z’ibanze kumva ko gufatira ifunguro ku ishuri atari iby’abarezi, ahubwo nabo bibareba mbere, kuko ikigambiriwe ari imibereho myiza y’umwana.

MENYA UMWANDITSI

Emmanuel Gasana Sebasaza

Umunyamakuru

@ SEBASAZAGEmman1

Reba inkuru zose nanditse ( 1816 )