Minisitiri Uwamariya avuga ko hagikenewe abarimu 7,000

Ni byo Minisitiri w’uburezi, Dr Uwamariya Valantine yatangarije mu kiganiro Ubyumva Ute cya KT Radio cyo ku wa Kane tariki 25 Gashyantare 2021, cyari gifite insanganyamatsiko ivuga ku bibazo by’abarimu n’itangira ry’amashuri.

Abajijwe ku kibazo cy’abarimu niba bahagije nyuma y’uko ibyumba by’amashuri byiyongereye, Minisitiri Dr Uwamariya, yavuze ko nubwo muri uyu mwaka Leta yinjije mu kazi abarimu bashya bangana na 1/3 cy’abasanzwe mu kazi, ngo hakigaragara icyuho aho imyanya ingana n’ibihumbi birindwi igihari.

Yagize ati “Abarimu bagiye mu myanya ni 24,825, mu mashuri y’inshuke tutagiragamo abarimu ni 580, mu mashuri abanza 18,155, mu mashuri yisumbuye y’ubumenyi rusange 6,090, mu mashuri y’imyuga n’ubumenyingiro 336, bose hamwe nibo batanga umubare wa 24,825”.

Arongera ati “Ntabwo bahagije, akenshi mu burezi tugira abakozi bava mu kazi mu buryo bukabije, ku buryo n’aba hari abo twohereje aho tubakeneye ku bigo by’amashuri batagiyeyo kubera impamvu bitandukanye, ariko n’abo twari dusanganwe hari bamwe batagarutse. Ubu turi kongera kwegeranya imibare kugira ngo tumenye abagiye ngo barangana iki kugira ngo tubasimbuze, mu mibare nari mfite ejo turacyafite icyuho cy’abarimu 7,000”.

Ikibazo cy’abarimu bize mu ishuri ry’abaporoso rya PIASS batemewe ku isoko ry’umurimo nacyo cyagarutsweho, aho bamwe mu barimu bagisiragira nyuma y’uko boherejwe mu kazi bagera mu turere boherejwemo bakangirwa gukora kandi boherejwe na REB, ubu bamwe bakaba bari mu gihirahiro.

Mu gusubiza icyo kibazo, Minisitiri yabanje gusobanura imikorere ya PIASS aho yemeza ko abanyeshuri biyandikisha kujya kwiga muri iryo shyuri mu rwego rwo kwiyungura ubumenyi (stage), ariko badategereje impamyabumenyi kuko iryo shuri ritaremererwa kuzitanga.

Yavuze ko abanyeshuri barangije muri iryo shuri ubwo babaga bagiye gusaba akazi mu burezi bagahabwaga binyuze mu rwego rw’igihugu rushinzwe amashuri makuru na kaminuza HEC, aho ubu byahagaritswe nyuma yuko byagaragaye ko byatezaga ibibazo mu burezi, hakaboneka abarimu bakora ako kazi batabifitiye ibyangombwa.

Ati “Ishuri ni ryo rigaragaza ko umunyeshuri yarangije, ariko umunyeshuri ararangiza stage akaza kwaka icyangombwa kuri HEC ntabwo ari uko bigenda, ibyemezo bigaragaza ko umunyeshuri yize kandi abifitiye impamyabumenyi bituruka ku ishuri ntabwo bituruka kuri HEC. Ikindi ni uko n’ubu baje kwaka akazi nk’uko bakakaka mu myaka yashizega”.

Arongera ati “Mu gihe ikibazo cyagaragaye, ari naho nshaka kugaruka kuri abo mu turere niba hari n’ababikoze ibyo bitemewe, abari mu kazi barahabwa umwaka kugira ngo buzuze ya masomo abura. Abo twinjije mu kazi bose bujuje ibyangomba, kubera ingaruka twagiye duhura nazo zo gusanga umubare munini w’abarimu bamaze igihe kinini mu kazi batujuje ibyangomba, kugira ngo dukemure ibibazo nta mwarimu uzongera kujya mu kazi atujuje ibisabwa”.

Mu gihe abarimu batangiye akazi hari abamaze amezi atatu bakora ariko hakaba abamaze guhembwa umushahara w’ukwezi kumwe gusa, Minisitiri yavuze ko hagiye hagaragaramo amakosa atandukanye kubera ubwinshi bwabo n’igihe gito cyakoreshejwe, avuga ko biri gutunganywa vuba kugira ngo abarimu bahembwe.

Ati “Twasohoye lisite nyinshi, ku itariki ya 01 Ukuboza 2020, tariki 5 Mutarama 2021, tariki 15 Mutarama 2021, byose bikajya kuri wa mukozi umwe mu karere, hari ibiza birimo amakosa ibindi bikaza bikerewe. Hari naho ugera ngo ugasanga birambitse hasi, mpita numva amakosa amwe aho abonekera kubera akazi kenshi, ariko ntabwo ari byiza ko umukozi akora ayo mezi yose adahembwa nta n’ukwiye kubyishimira gusa birakosorwa”.

Uwo muyobozi yavuze ko abarimu baherutse kwinjizwa mu kazi bagize 1/3 cy’abarimu bose bo mu Rwanda, niho ahera avuga ko mu kubuzuriza amadosiye bisaba ubushishozi mu kwirinda ko habaho amakosa Minisiteri y’imari ikaba yahemba umukozi utakiri mu kazi aho byagiye bigaragara mu myaka yashize.

Hari ubwo hahembwaga n’abarimu batakiri mu mirimo ibyo bikaba byakurura ikibazo cy’ikoreshwa nabi ry’ingengo y’imari y’igihugu cyangwa bigakurura imanza zitari ngombwa hagamijwe kugaruza umutungo wa Leta.

Kugeza ubu abarimu bashya basabye akazi ni ibihumbi 54 aho ibihumbi 24 aribo bagahawe kuko aribo basanze bujuje ibyangombwa byose bisabwa.

Abo barimu bongerewe mu kazi nyuma y’uko ibyumba by’amashuri bishya byuzuye hirya no hino mu turere tw’igihugu, ahubatswe amashuri ibihumbi 22,500 amaze kuzura akaba ari hagati ya 92 na 93%.

MENYA UMWANDITSI

Servilien Mutuyimana

Umunyamakuru

@ mutuyiserv

Reba inkuru zose nanditse ( 1846 )