Nyuma y’igitambo cya misa cyatuwe na Musenyeri Firipo Rukamba, umushumba wa Diyosezi Gatulika ya Butare, ibirori nyir’izina byo kwizihiza uyu munsi byabimburiwe n’akarasisi k’abarimu bigisha n’abigishije muri iki kigo, ndetse n’abanyeshuri baharangije.

Abanyeshuri baharangije bagaragaye muri aka karasisi bari mu byiciro bitandukanye, hakurikije igihe bahigiye : abahize hagati ya 2010 na 2012, abahize hagati ya 2006 na 2009, 2002 na 2005 … Gusa, abahize hagati ya 1938 na 1950 bagaragaye ku karasisi ni abakecuru b’ababikira babiri gusa.

Gushima no kwishimira uburezi iki kigo cyagejeje ku bana b’Abanyarwanda, cyane cyane Abanyarwandakazi, ni yo magambo yagarutsweho n’abafashe ijambo muri ibi birori.

Nta mugayo kandi, iri shuri ni ryo rya mbere mu Rwanda mu kwigisha abakobwa, kandi ni na bo bonyine ryakunze kwigisha. Abana b’abahungu batangiye kuhiga mu mwaka w’1992.

Ku ikubitiro ho, ngo bigishaga abarimu bazigisha abandi. Maria Renata Kanzige, umwe muri ba babiri bahize hagati ya 1938 na 1950 bagaragaye ku karasisi, we yanatubwiye ko ishuri rigifungura imiryango ryigishaga ababikira b’abenebikira bari bagenewe kuzarera abana b’abakobwa.

Tito Rutaremara, umubyeyi uhagarariye abandi barerera muri iki kigo yavuze ko uzanye umwana we kuhiga aba yizeye ko azahakura ubumenyi n’uburere. Yagize ati « uretse gutoza umwana umuco, banamutoza kuba umunyagihugu mwiza. Ikindi kandi bakurikirana abana bose ku buryo baba bazi buri wese ku giti cye».

Kuri iyi ngingo yo gukurikirana uburere bw’abana, Musenyeri Rukamba yaboneyeho kwibutsa ababyeyi ko batagomba kumva ko uburere bahabwa n’ikigo buhagije, bakaba bagomba na bo ubwabo gukurikirana abana babo.

Uyu mushumba kandi yanibukije abana bahiga ko bagomba kwiga bashyizeho umwete, kuko ngo n’uwasenga ngo atsinde atize bitashoboka, ndetse anasaba abaharangije kuzibumbira mu ishyirahamwe rizajya rifasha ikigo mu kurera barumuna babo.

Ubufatanye bw’ababyeyi ndetse n’abarezi bwanagarutsweho na Minisitiri w’Intebe, Dr. Pierre Damien Habumuremyi, asaba ababyeyi kwibuka inshingano zabo zo kurera abana babyaye ndetse no kubashyira mu ishuri bakiga, cyane cyane bakiga imyuga ibafasha kwihangira imirimo badategereje kujya gusaba akazi.

Minisitiri w’Intebe kandi yashimye ubufatanye Kiliziya Gatolika ifitanye na Leta mu kurerera igihugu. Yagize ati « mu mashuri bayobora hagaragara ubwitange. Bafata umwanya uhagije wo kwita ku bo barera kandi ntabwo bajenjeka muri disipurine… N’ibindi bigo bijye bibareberaho».

Marie Claire Joyeuse