Abo banyeshuri barimo 964 bahawe impamyabumenyi z’icyiciro cya kabiri cya Kaminuza mu mashami yigisha ibyerekeranye n’Iterambere ry’Umuryango, imicungire no gutwara ibicuruzwa, Ubucuruzi, ikoranabuhanga, Ubukerarugendo n’amahoteli. Hari n’abandi 38 bahawe impamyabushobozi nyuma yo kwiga imyuga itandukanye.

Uwikunda Ghislaine wigaga ibyerekeranye n’imicungire y’amahoteli na Resitora, yagize ati “Rwari urugendo rurerure kandi rutoroshye, ariko twishimiye ko rurangiye. Turashima ubumenyi baduhaye kuko ni yo kaminuza ifite ubushobozi bwo kwigisha neza ibyerekeranye n’amahoteli n’ubukerarugendo. Ni Kaminuza wigamo ugashobora no kubona akazi utari warangiza amasomo yawe. Rero ubumenyi tuhakuye buraduha icyizere cyuzuye ko nta mpungenge tuzagira mu kazi kacu.”

Mugenzi we witwa Ephraim uturuka muri Repubulika Iharanira Demokarasi ya Congo (RDC) wahawe impamyabumenyi mu bijyanye no gutwara ibicuruzwa (Logistics Management), we yavuze ko yishimiye kuba agiye gushyira mu ngiro ibyo yakuze akunda gukora.

Ati “Byari inzozi zanjye gukora mu byo gutwara ibicuruzwa, naje aha muri UTB kwiga kugira ngo menye byinshi. Uyu munsi icyo naje nshaka nakibonye,ndishimye. Nk’abanyeshuri b’abanyamahanga nta kibazo twagize.”

Mukarubega Zulfat washinze Kaminuza ya UTB, yageneye ubutumwa abarangije muri iyo kaminuza, ati “Ari ukora akore neza, ari utangiza ubucuruzi abukore neza, yiteze imbere, ateza imbere n’Igihugu. Ndizera ko inyigisho mwagiye mubona mu by’ukuri zabagiriye akamaro kandi mugiye kuzishyira mu bikorwa. Tuzahorana hafi, ari mu kujya inama, kugisha inama no kugirwa inama kugira ngo ibyo twifuza tubigereho.”

Ni ku nshuro ya cumi iyi Kaminuza ya UTB ishyize ku isoko ry’umurimo abanyeshuri bayizemo, kuri iyi nshuro by’umwihariko ibirori bikaba byabereye ku cyicaro cyayo gishya n’inyubako nshya iherutse kwimukiramo ku Irebero mu Karere ka Kicukiro.