Umuhango wo gutaha inyubako za SACCO mu karere ka Rutsiro wafunguwe ku mugaragaro n’umuyobozi w’intara y’Iburengerazuba, Kabahizi Célestin, tariki 23/05/2013 akaba yari aherekejwe n’abayobozi bo mu karere, abo mu kigo cy’igihugu gishinzwe amakoperative ndetse n’abaturage.

Guverineri Kabahizi yavuze ko kuba akarere kabashije kubaka ndetse no gutaha ku mugaragaro izo nyubako ari ikimenyetso cyo kwigira kivana abaturage b’u Rwanda munsi y’umurongo w’ubukene.

Yagize ati: “Iki ni ikimenyetso cy’agaciro mwiha nk’Abanyarwanda, agaciro muha igihugu cyacu, mu rwego rwo kugira ngo tuzagere kuri ya ntego y’intumbero 2020 yo kuvana abaturage munsi y’umurongo w’ubukene”.

Umuyobozi w’akarere ka Rutsiro, Byukusenge Gaspard, yakanguriye abaturage ba Rutsiro muri rusange kwitabira gukorana na SACCO, asaba abahabwa inguzanyo kwishyurira igihe, hanyuma n’abandi basigaye batarafunguza konti bakazifunguza, kandi bagakorana neza na SACCO kugira ngo izo SACCO zuzuye zikomeze zitere imbere, zizagere ku rwego rurenze urwo zigezeho.

Inyubako z’imirenge SACCO zitashywe ku mugaragaro mu gihe SACCO zatangiye zikorera mu nyubako z’utugari n’imirenge, ndetse no mu zindi nyubako zidasobanutse, ariko kuri ubu buri murenge wose wo mu karere ka Rutsiro ukaba wiyujurije inyubako yawo.

Malachie Hakizimana