Ababyeyi ndetse n’abarezi basanga gufunguriza umunyeshuri konti ari ukumwigisha uburyo bwo kwiteganyiriza mu gihe kizaza no kuzamufasha kwihangira umurimo igihe yaba arangije amashuri ye.

Bamwe mu banyeshuri bafungurijwe konti mu gikorwa cyo gutangiza iyi gahunda ya “Mbikira” batangaje ko bibashimishije cyane kandi ko ngo bizabafasha kwishyura amashuri yabo ndetse n’igihe bazaba barangije kwiga amashuri yabo.

Ruzindana Augustin uhagarariye ababyeyi barerera kuri GS Kibungo A yatangirijwemo iki gikorwa kuri uyu wa 25/09/2013, yatangarije itangazamakuru ko gahunda yo kuzigamira abana yakagombye kuba umuco kandi ababyeyi bakabigiramo uruhare kugirango izafashe abana babo igihe kizaza.

Alphonsine Musabyimana, ushinzwe ibikorwa byo kwamamaza mu cyigo cy’imari iciriritse RIM Ltd cyashinzwe na kiliziya Gatorika avuga ko konti “Mbikira” izagirira abana bose akamaro kanini ndetse ikaba izanahindura byinshi ku buzima bwabo.

Yagize ati “Tumaze kubona uburyo abana bava mu mashuri, abandi igihe barangije kwiga bakabura akazi , twaratekereje tuti ese nta buryo umwana twamutoza kwizigamira akiri muto kugirango bizamurinde kwandagara igihe ari umushomeri ndetse bibe byanamufasha kwihangira umurimo? Nibwo twashyizeho ubu buryo.”

Mu gihugu hose iyi gahunda yateganirijwe abana bato n’abiga imaze gutangizwa mu mashami 12 ya RIM Ltd ari hirya no hino mu gihugu. Ikazakomereza no mu bindi bigo by’amashuri bitandukanye bya hano mu gihugu.

Jean Claude Gakwaya