Inyungu mu kigega RNIT Iterambere Fund yariyongereye igera kuri 11.42%

Ubuyobozi bw’ikigega RNIT Iterambere Fund buratangaza ko mu mwaka wa 2022 inyungu yiyongereye kugera kuri 11.42% ivuye kuri 11.22% yariho mu mwaka wa 2021.

RNIT Iterambere Fund mu mwaka ushize wa 2022 yungutse abanyamuryango ibihumbi bitanu
RNIT Iterambere Fund mu mwaka ushize wa 2022 yungutse abanyamuryango ibihumbi bitanu

Umwaka wa 2022 waranzwe n’ibikorwa bitandukanye bijyanye n’ubukangurambaga hafi mu Gihugu hose, binyuze mu bitangazamakuru bitandukanye ndetse n’ubufatanye mu rwego rw’imyidagaduro n’imikino mu kwamamaza ibikorwa by’iki kigega, aho umusaruro wavuyemo wagaragariye mu bwiyongere bw’abizigimira haba ku giti cyabo cyangwa abanyura mu bimina.

Ni ibikorwa byatumye ugereranyije n’umwaka wa 2021 ubwizigame bwiyongera kugera hafi kuri miliyari 10, kuko bwavuye kuri miliyari 18 bukagera kuri miliyari 28, hanasubizwa amafaranga bene yo agera kuri miliyari 4.

Kimwe mu bikorwa iki kigega cyishimira ko byagezweho mu mwaka wa 2022 harimo amafaranga y’inyungu yabonetse agera kuri miliyari 2.3, avuye kuri miriyari 1.9 yari yabonetse mu mwaka wa 2021.

Bamwe mu rubyiruko rw’abanyamuryango ba RNIT Iterambere Fund, bavuga ko nubwo urubyiruko akenshi rudakunda kugira umuco wo kwizigamira kubera ko baba bafite amafaranga make, ikigega RNIT Iterambere Fund kiborohereza kuzigama amafaranga ajyanye n’ubushobozi bwabo kandi bakabona inyungu, ku buryo byabaremyemo umuco wo kwizigamira.

Innocent Nshuti ni umwe muri abo banyamuryango. Avuga ko kwizigamira mu kigega RNIT Iterambere Fund byamufashije guhinduka mu mitekerereze.

Ati “Ikintu bimaze kumpinduraho ni mu mitekerereze cyane ukagira uwo muco wo kubika, ku buryo nsigaye numva ko mbere yo kugira ikindi kintu nkora, nsigaye numva ko nshaka kubika mbere na mbere, numva ko nagabanya amafaranga nkoresha nkongera ayo mbitsa, ni ikintu gifatika bimaze kumpindura mu mitekerereze”.

Bamwe mu rubyiruko rw'abanyamuryango ba RNIT Iterambere Fund, bavuga ko icyo kigega kiborohereza kwizigamira bijyanye n'amikoro yabo
Bamwe mu rubyiruko rw’abanyamuryango ba RNIT Iterambere Fund, bavuga ko icyo kigega kiborohereza kwizigamira bijyanye n’amikoro yabo

Diane Uwimana ukiri mu mashuri yisumbuye, avuga ko nk’urubyiruko bagomba gutekereza neza ko ubuzima bwabo ari ingenzi bakabuteganyiriza hakiri kare.

Ati “Amafaranga asabwa kwizigamiramo ni amafaranga adashobora kubura cyane, kuko ibihumbi bibiri n’umwana muto ashobora kuyabona. Nk’ubu nkanjye ukuntu mbigenza mfite agasanduku nshyiramo ibiceri mu rugo byakuzura ibihumbi bibiri nkabona ubwizigame, nkajya kwizigamira. Ubushobozi ndumva butaba ikibazo ahubwo twagena uburyo twajya twizigamira kandi bidaciye mu nzira mbi”.

Umuyobozi w’Inama y’abahagarariye abanyamigabane mu kigega RNIT Iterambere Fund, Dr. Joseph Nzabonikuza, avuga ko kuba inyungu irimo kugenda izamuka bivuze ikintu gikomeye cyane ku banyamuryango.

Ati “Bivuze ikintu gikomeye cyane kuko iri shoramari rikomatanyije risaba ko amafaranga uko aba menshi ni na ko amahirwe yo kubona inyungu nyinshi bishoboka, kubera ko aya mafaranga dushyira hamwe buri muntu ku giti cye ashora mu mpapuro mpeshwamwenda za Leta, ni byo twahisemo kugira ngo abantu bafite amikoro aciriritse bifatanye n’abafite amafaranga menshi bityo ashorwe ari menshi, ariko byumvikane ko wa wundi ufite menshi n’ufite make inyungu ni imwe kuko 11.42% ni inyungu twese tubona uko waba ungana kose”.

Ubwo abanyamuryango bahuraga ku nshuro ya kane n’ubuyobozi bw’iki kigega kuri uyu wa Gatanu tariki 31 Werurwe 2023, hagamijwe kugira ngo bagaragarizwe ibyagezweho mu mwaka ushize, umuyobozi Mukuru wa RNIT Iterambere Fund, Jonathan S. Gatera, yavuze ko kuba ikoranabuhanga bakoresha ryaravuguruwe bizarushaho korohereza abanyamuryango.

Jonathan Gatera avuga ko barimo gutekereza uburyo n'amafaranga y'amanyamahanga yajya abitswa kugira ngo birusheho korohereza abari muri Diaspora
Jonathan Gatera avuga ko barimo gutekereza uburyo n’amafaranga y’amanyamahanga yajya abitswa kugira ngo birusheho korohereza abari muri Diaspora

Yagize ati “Ubu ibintu byose byarorohejwe kandi biri mu Kinyarwanda no mu Cyongereza, twizera ko abantu benshi babyumva, byoroheje uburyo bwo kwiyandikisha, kwinjira, gusaba serivisi y’amafaranga, uburyo bwo kuba wahererekanya umutungo wawe mu kigega ukawuha undi, ibyo byose ni ibintu byazanywe n’iryo koranabuhanga bitariho”.

Mu rwego rwo gukomeza korohereza abanyamuryango ubuyobozi bwa RNIT Iterambere Fund buvuga ko harimo gutekerezwa uburyo abari muri Diaspora bashobora kwizigamira bakoresheje amafaranga y’amahanga kubera ko kuba bitarashoboka ari kimwe mu bikoma mu nkokora ubwitabire bwabo, kuko kugeza ubu abanyamuryango ari 27 gusa.

Mu mwaka ushize ikigega RNIT Iterambere Fund cyungutse abanyamuryango bashya ibihumbi bitanu (5000).

kigalitoday android app mobile

Ibitekerezo   ( 2 )

Hashize igihe abakozi banyu bavuga ko umuntu ashobora uzajya areba ayo agejejemo ariko yaheze mu amagambo gusa. Muriho mukorana iki ngo mubikemure? Imvugo ni ibe ingiro

Hippolyte Utamuzi yanditse ku itariki ya: 10-08-2023  →  Musubize

Ikibazo?Kugeza ubu umugabane kumunyamuryango ugura angahe.

Inyungu dividends abanyamigabane bazibona nyuma y’igihe kingana iki?
Murakoze.

Richard Mundere yanditse ku itariki ya: 4-08-2023  →  Musubize

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka