Ibyo bizatuma iryo shyirahamwe rirushaho gukora ridahanze amaso abafanyabikorwa, kuko kugeza ubu ari bo bafite uruhare runini mu ngengo y’imari rikoresha, bigatuma hari serivisi zimwe zitagera ku banyamuryango uko bikwiye.

Nkuranga Aimable, Umuyobozi nshingwabikorwa wa AMIR, yabigarutseho mu Karere ka Musanze, ubwo hatangizwaga icyumweru cyahariwe ibigo by’imari iciriritse, kuri uyu wa Mbere tariki 19 Ugushyingo 2018.

Ihuriro ry’ibigo by’imari icirirtse riratangaza ko kuva mu myaka itandatu ishize mu ngengo y’imari ikoreshwa, ingana na 60% itangwa n’abaterankunga, bigatuma hari ibikorwa bimwe na bimwe bifitiye abanyamuryango akamaro bitagerwaho uko bikwiye.

Twizerimana Dorothee, umwe mu bayobora ibigo by’imari mu Karere ka Musanze, yagaragaje ko bafashe ingamba zizabafasha kwigira, harimo no kuba abahabwa inguzanyo bakwiye gufata iya mbere bakajya bishyura ku gihe.

Gusa abanyamuryango bishimiye ko hari urwego bamaze kugeraho, nyuma y’imyaka itari mike ishize hongerewe imbaraga mu gushyiraho ibigo by’imari no gukangurira Abaturarwanda kubigana.

Iki cyumweru gifite insanganyamatsiko igira iti “Imiyoborere myiza, inkingi y’iterambere mu bigo by’imari iciriritse”, yashyizweho mu rwego rwo gukangurira abakora muri ibyo bigo by’imari gutanga serivisi nziza, kwirinda ruswa no guhangana n’ikibazo cy’imikorere idahwitse ikigaragara hamwe na hamwe.