Yatekerezaga umushinga yakora akabona amafaranga yo kuriha Masters, kandi akarihira n’umugore kaminuza akabona atawubona ariko aza kwinjira mu bworozi bw’ingurube biramuhira ariga ararangiza.

Mu ngurube yoroye zirimo ubwoko bw’ingurube zikura cyane kandi vuba zitwa Landrece. Uretse ingurube za Landrece kandi uyu mworozi wabigize umwuga yorora ingurube za Pietrain zagenewe gutanga inyama.

Shirimpumu Jean Claude yerekana ikibwana k’ingurube uko kiba kingana.

Ubu bworozi bwe abufashwamo n’umubyeyi we Nyirabagenzi Agnes aho amufasha gukurikirana ubuzima bw’izi ngurube ze zose. Nyirabagenzi avuga ko byamufashije kuzamura imibereho yabo ndetse n’abaturage bo muri aka karere kuko babakuraho icyororo.

Ikindi ni uko zibaha ifumbire ugasanga bateye imbere no mu buhinzi aho bafumbiza ifumbire ikomoka kuri ayo matungo yabo y’ingurube.
Gusa avuga ko no kuzorora bitabagora kuko abakozi batatu bazitaho bahembwa n’amafaranga akomoka kurizo ngurube.

Ingurube zo mu bwoko bwa Landrece.

Nyirabagenzi avuga kandi ko umwana we wanyuma ari muri kaminuza mu mwaka wa gatatu kubera ubwo bworozi bw’umuhungu we Shirimpumu Jean Claude.

Ikindi n’uko ubu bworozi bwabo bufasha n’urubyiruko gukora urugendoshuri rwo kubigiraho uburyo bororamo izo ngurube.

Musabyimana Leonille uturuka mu karere ka Musanze avuga ko yahagurutse iwabo aje kwigira ku bworozi bwo muri uru rugo rwa Nyirabagenzi Agnes afashamo umuhungu we Shirimpumu Jean Claude.

Ingurube yoroye yonsa ibyana byayo.

Avuga ko ubumenyi ahakuye buzamufasha gushishikariza urundi rubyiruko gutangira umushinga wo korora ingurube kuko yasanze bitagoye kandi yabishobora.

Bateganya kuzagana banki ikabaguriza maze bakagenda bishyura buke buke ariko bakabasha kugera ku rugero rushimishije nk’urwo basanganye uyu mworozi ntangarugero wo mu karere ka Gicumbi.

Ernestine Musanabera