Bamwe mu bikorera ku giti cyabo mu karere ka Rulindo ngo babona iyo gahunda yiswe Rwanda Public Private Dialogue (RPPD) yatangijwe tariki 04/02/2013 ari uburyo bwiza buzatuma ibyo bakora bishobora gutera imbere byihuse, kandi bikamenyekana hose.

Rusanganwa Leon Pierre, umukozi w’urwego rw’abikorera ku giti cyabo (PSF), ku rwego rw’igihugu, avuga ko ibiganiro hagati yabo bizakemura byinshi.

Yagize ati “Ibiganiro hagati y’ubuyobozi n’abikorera bizakemura ibibazo byinshi byabonekaga hagati yacu ariko bikaburirwa ibisubizo. Ubu noneho hari ikizere cy’uko ubuyobozi bugiye kutuba hafi natwe tukabwegera tugafatanya kurebera hamwe icyazamura iterambere ry’igihugu cyacu ryihuse.”

Ubu buryo bw’ibiganiro hagati y’abikorera ku giti cyabo n’ubuyobozi bw’ibanze ,ngo buzafasha n’ubuyobozi kumenya neza abikorera mu karere; nk’uko byemezwa na Kangwagye Justus, umuyobozi w’akarere ka Rulindo.

Yagize ati “kuganira hagati yacu bizadufasha kumenyana neza n’abikorera bari mu karere. Abikorera barasabwa kurushaho kwegera ubuyobozi kugira ngo dufatanirize hamwe gukemura ibibazo hagati y’ubuyobozi n’abikorera”.

Abikorera kandi nabo bagaragaje uko babona ibiganiro hagati yabo n’ubuyobozi bizateza imbere ibikorwa byabo mu karere ndetse no hanze yako.

Sina Gerard, umuyobozi wa Entreprise Urwibutso, yagize ati “twe nk’abacuruzi turabona hari ikizere cy’uko tugiye gukorana neza n’ubuyobozi kandi n’ubundi imikoranire yacu yari myiza, ariko noneho bigiye kugira imbaraga zitari zisanzwe. Ibi kandi bizatuma ibikorwa byacu bitera imbere kurushaho no kumenyakana.”

Akomeza avuga ko asanga ibikorwa by’abikorera bigomba kumenyekana mu gihugu hose, ndetse bikanambuka n’imipaka bikagera mu mahanga.

Abikorera mu karere ka Rulindo ngo basanga ibikorwa byabo bigiye kugira agaciro, no gutera imbere ku buryo bwisumbuyeho ,ubwo ubuyobozi bugiye kujya bubagira inama no kuganira nabo.

Hortense Munyantore