Uyu mugore yazitanze ashimira Leta y’u Rwanda, avuga ko abahejejwe inyuma n’amateka bari barambuwe agaciro, ariko ubu Leta y’u Rwanda ikaba yarakabashubije. Azitanga yavuze ko buri kivaze gifite agaciro k’amafaranga ibihumbi 15.

Nyuma yo gutanga ibyo bivaze nk’umusanzu we mu kigega cyo kwihesha agaciro, hari umuntu wifuje kubigura amafaranga ibihumbi 30 nk’uko nyirabyo yari yabihaye agaciro. Cyakora ntiyabihawe, ahubwo byahise bishyirwa mu cyamunara kugira ngo utanga amafaranga menshi abe ari we ubyegukana.

Abantu batandukanye bakomeje kubitangaho amafaranga kugeza ku bihumbi 250, birangira umukozi wo mu kigo cya WMP Ltd gicukura amabuye y’agaciro mu birombe bya Rwinkwavu ari we ubyegukanye ku mafaranga ibihumbi 500.

Ibi bivaze byombi byaguzwe ibihumbi 500. Nyirabyo wambaye imyenda y’umukara yari yabihaye Agaciro Development Fund.

Ayo mafaranga na yo yahise ashyirwa mu kigega cyo kwihesha agaciro. Abari bitabiriye umuhango wo gutangiza icyo kigega bishimiye cyane umuhango wo kugura ibyo bivaze mu cyamunara, dore ko byari bimeze nka byendagusetsa.

Nyuma yo kugurisha ibyo bivaze, hakurikiyeho agakino kameze nka byendagusetsa. Bamwe mu banyamabanga nshingwabikorwa b’imirenge batangaga amafaranga bakamera nk’abaguze bagenzi ba bo, ku buryo uwagurwaga yasabwaga kwishyura amafaranga aruta ayo yaguzwe kugira ngo abe yigomboye, atabishobora bikamera nk’igisebo kuri we cyangwa abaturage be bakamurwanaho.

Udukino nk’utwo twatumye imisanzu yiyongera kuko hari bamwe babikoraga bagamije kwishimisha gusa bigatuma n’amafaranga yo gushyigikira ikigega cyo kwihesha agaciro atubuka.

Cyprien M. Ngendahimana