Leta yafashe icyemezo guhagarika uburobyi mu Kivu igihe cy’amezi abiri nyuma y’aho umusaruro w’amafi wari umaze kugabanuka cyane. Kuroba mu Kivu byabaye bihagaze kuva tariki 29/07 kuzageza tariki 02/10/2012.

Bamwe mu barobyi batashatse kwivuga amazina bavuga ko guhagarika uburobyi igihe cy’amezi abiri byaje bitunguranye cyane ku buryo batabashije kubona umwanya wo kwitegura uko bazabyifatamo igihe amato yabo azaba ahagaze adakora.

Umwe muri bo aragira ati: “Ubu se ko amato yacu akoze mu mbaho, mukaba muzi neza ko imbaho zibora iyo ziri mu mazi, murabona tuzabigenza dute?”.

Amato yakoreshwaga mu burobyi aparitse mu Kivu imbere y’inzu ya koperative y’abarobyi i Karongi.

Ubuyobozi buvuga ko icyi cyemezo cyafashwe hagamijwe kurengera inyungu abarobyi ubwabo, abacuruza ibikomoka ku burobyi ndetse n’ababikinera umunsi ku wundi kubera ko umusaruro wabyo wari umaze kugabanuka bikabije.

Uku kugabanuka ngo kwatewe n’akajagari kari gasigaye kari mu burobyi, n’abarobyi bakoreshaga imiraga (imitego) itemewe, yarobaga n’amagi cyangwa udufi tutarakura.

Umuhuzabikorwa w’umushinga w’uburobyi mu karere ka Karongi, Sibomana Jean Bosco, avuga ko mbere y’uko uburobyi buhagarikwa, umurobyi yari asigaye aroba ibiro bitarenze bitanu by’amafi, kandi mbere ngo yashoboraga kuroba ibiro biri hagati ya 50 na 80 ku munsi.

Gasana Marcellin