Abacuruzi bavuga ko mu gihe k’izuba babangamirwa n’ivumbi ariko byagera mu gihe cy’imvura bikabakomerera kurushaho, kuko banyagirwa n’ibicuruzwa bya bo bikangirika, nk’uko Nizeyimana Silas ucururiza mu gice cy’iryo soko kidaskaye abivuga.

Abacururiza ahasakaye nabo bavuga ko hari ubwo banyagirwa bitewe n’uburyo barisakaye nabi. Kuri ibyo ariko ngo hiyongeraho ikibazo cyo kuba ibisima bacururizaho bidafungwa ku buryo babikamo ibicuruzwa bya bo batashye nk’uko bigenda mu yandi masoko.

N’ubwo ingaruka ziterwa no kuba isoko rya Kabarondo ritubakiye neza zitagera ku barikoreramo ku buryo bungana, bavuga ko hakwiye kugira igikorwa kugira ngo bakorere ahantu hameze neza kuko batanga imisoro ya buri kwezi muri iryo soko.

Umuyobozi w’akarere ka Kayonza Mugabo John avuga ko imirimo yo gusana iryo soko iri hafi gutangira. Avuga ko rwiyemezamirimo uzarisana ubu ari kubaka umusarani ku kibuga cya Rusera cyo mu kagari ka Rusera mu murenge wa Kabarondo, abacururiza mu isoko rya Kabarondo bakaba ariho bazaba bimuriwe mu gihe riri gusanwa.

Yongeraho ko uwo musarani uri hafi kuzura ku buryo abacuruzi bazahita bimuka gusana isoko bigatangira. Uretse isoko rya Kabarondo rigaragaramo ibibazo, abacururiza mu rya Mukarange ry’umujyi wa Kayonza iyo bavuze ibibazo bya bo wumva bidatandukanye n’iby’abacururiza i Kabarondo.

Ubuyobozi bw’akarere ka Kayonza bufite gahunda yo kubaka isoko rya kijyambere rizatwara miriyari zisaga eshatu z’amafaranga y’u Rwanda, ariko umushinga wo kuryubaka wabaye uhagaze bitewe n’uko ayo mafaranga ataraboneka.

Gusa ngo hari miriyoni 50 zizaba zifashishwa mu gusana ayo masoko yombi nk’uko umuyobozi w’akarere abivuga.

Cyprien M. Ngendahimana