Umunyamabanga Nshingwabikorwa w’Umurenge wa Musha, Jérôme Tumusifu, avuga ko bashyizeho ubu buryo bwo kwinjira umwe umwe mu rwego rwo kurinda abaturage kwandura indwara ya coronavirus, bagendeye ku mabwiriza ya Minisitiri w’Intebe.

Agira ati “Twahereye ku kuba ari ryo soko rikomeye mu karere kacu, hanyuma tubisanisha n’icyorezo cya coronavirus ndetse n’ingamba twahawe na Minisitiri w’Intebe zo kurinda abaturage nk’inzego z’ibanze. Kuko n’ubwo ingendo zidafite ibisobanuro zahagaze, guhaha ibiribwa byo byagombaga gukomeza, kandi tugomba no kurinda abaturage bacu.”

Ku miryango ibiri y’isoko bahashushanyije utuzu twa metero kuri metero, uje mu isoko akagenda ahagarara muri kamwe, umuri inyuma mu ke, gutyo gutyo.

Ibi ni mu rwego rwo kugira ngo abantu bahane umwanya mu gukaraba intoki kuri kandagira ukarabe iri ku muryango w’isoko, nta kwegerana.

Imbere mu isoko na ho bagiye bahashyira abibutsa abantu ko batagomba kwegerana igihe bari guhaha. Uretse ko n’abacuruzi bari mu isoko ubwabo bagiye bahana intera kubera ko abacuruza ibindi bahagaritswe, hagasigara ab’ibiribwa, hanyuma bagahabwa ameza yose.

Ku bacururiza mu mabutike, ingamba yafashwe ni iyo kuba abaguzi batinjiramo ahubwo abacuruzi bakabasangisha hanze ibyo bakeneye.

Tumusifu ati “Ku mabutike na ho twahashyize imishipiri yo guhanahana intera. Buriya mu isantere ya Musha nta winjira ngo ajye guhaha n’ubwo yaba ari umwe. Umucuruzi ni we umusanga akamubwira icyo akeneye, akakimuzanira. Ariko mbere yo kwaka icyo akeneye abanza gukaraba intoki.”

Umukozi ushinzwe inozabubanyi mu Karere ka Gisagara, avuga ko nyuma y’uko umuyobozi w’Akarere ka Gisagara yabonye iby’iyi myitwarire mu isoko rya Musha akanayishima, yasabye ko no mu yindi mirenge yo mu Karere ka Gisagara babigana.