Ubucuruzi buciriritse bugira uruhare rukomeye mu iterambere rusange ry’ibihugu bigize umuryango w’Afurika y’Uburasirazuba (EAC) kuko bukorwa n’umubare munini w’abacuruzi bato babukuramo amafaranga abatunga.

Inyungu iri mu masezerano yasinywe tariki 16/03/2012 ni uko ubucuruzi buzihuta kubera ko abacuruzi bazajya babona icyemezo cy’inkomoko hafi bikabafasha kutazongera kwishyura amahoro ku bicuruzwa bitagomba gusora.

Iyo ibyo bicuruzwa byabaga bidafite icyo cyemezo byasoraga bigatuma rimwe na rimwe abacuruzi batanga ruswa cynagwa bagakora ubucuruzi bwa magendo.

Muri ayo masezerano hazakorwa urutonde rw’ibicuruzwa bikorerwa mu bihugu byombi rwumvinyweho n’impande zombi ndetse hakorwe n’icyemezo cy’inkomoko cyoroheje (simplified sertificate origin) bizajya biboneka mu biro bya za gasutamo ku mipaka.

Uhagarariye umuyobozi mu rugaga rw’abikorera ku rwego rw’igihugu, Gerard Mukubu, yavuze ko koroherezwa bahawe nk’abacuruzi bivuga ko bazunguka bagatanga imisoro igihugu kikunguka ari nako nabo bunguka.

Odette Uwamariya, Guverineri w’intara y’iburasirazuba, yasabye abacuruzi bose gukoresha amahirwe bahawe ku ruhande rw’u Rwanda na Tanzaniya kugira ngo bakore ubucuruzi bwabo neza.

Kuba horohejwe uburyo bwo gutanga serivise ku bacuruzi bato basorera ku mipaka bizatuma bakora neza maze biteze imbere; nk’uko byatangajwe n’umuyobozi w’akarere ka kirehe, Murayire Protais.

Yaboneyeho kubwira abacuruzi bakorera ku Rusumo ko bitarenze icyumweru umuriro w’amashanyarazi uzaba uhageze kuko bashinze amapiloni ikibura ni ukuhashyira umuriro.

Grégoire Kagenzi