Mu nama yabaye kuri uyu wa gatanu tariki 15/5/2015, ubuyobozi bw’ikigo gishinzwe iby’imitangire y’amasoko ya Leta (RPPA) ari nacyo cyateguye iyi nama, yasobanuye ko ari inama igamije kunoza imitangire y’amasoko ya leta n’imikorere inoze kuri bamwe muri ba rwiyemezamirimo bagenda bavugwaho kwambura abaturage baba bakoresheje mu mirimo.

Umuyobozi w’ishami rishinzwe kongera ubumenyi muri RPPA, Sibomana Célèstin, yabwiye Kigali Today ko hateguwe iyi nama hagamijwe gusobanura itegeko rishya ryo ku wa 13/2/2013 rigenga imitangire y’amasoko ya Leta kugira ngo abo rireba barusheho kurigira iryabo baryubahiriza.

Zimwe mu ngingo nshya ziri muri iri tegeko ugereranyije n’iryari risanzweho ryo mu 2007, ni uko ryemera ko mu gihe habayeho ikibazo gitunguranye nk’ikiza cyangwa hateye icyorezo runaka Leta cyangwa ikigo runaka gishobora gukora ubutabazi bwihuse hatiriwe hatangwa isoko.

Iyi nama yahuje abakozi mu turere bashinzwe gutanga amasoko ya Leta na ba Rwiyemezamirimo yanagarutse ku kibazo cy’abahabwa amasoko ya Leta bagatinda kwishyurwa n’inzego za Leta nyuma bikababyarira igihombo.

Nk’uko byavuzwe na bamwe muri ba rwiyemezamirimo baganiriye na Kigali Today, ngo amwe muri ayo mafaranga baba bakoresheje aba ari inguzanyo za banki bityo uko Leta itinda kubishyura bagacibwa amande ku buryo bw’amaherere.

Nyuma yo gusobanurirwa ibijyanye n’iri tegeko abunguranaga inama kuri iri tegeko, bishimiye ko rinateganya ibihano ku muntu wese utubahirije amasezerano impande zombi ziba zagiranye mu birebana n’imitangire y’amasoko ya Leta.

Ubu itegeko rishya rijyanye n’imitangire y’amasoko ya Leta rigizwe n’ingingo 64 harimo 51 zavuguruwe n’izindi ngingo nshya zongewemo 13, mu rwego rwo kurivugurura ngo rijyane n’igihe.

Jean Pierre Twizeyeyezu