Ku ikubitiro yahise atangira kuhubakisha umusigiti w’icyitegerezo, anataha amazi meza yagejeje ku batuye aka gace, nk’uko yabitangaje kuwa gatanu tariki 18 Nzeri 2015.

Imamu w’akarere ka Nyanza mu idini rya Islam Kabiriti Asumani, yavuze ko uyu musigiti urimo kubakwa i Mugandamure ku nkunga y’uyu mugabo wo muri Arabia Saudite izaba ari icyitegerezo mu Rwanda hose.

Yagize ati “Hirya no hino mu nkengero z’uyu musigiti hazubakwa amazu y’amacumbi ndetse n’inzu mberabyombi nini izajya yakirirwamo inama zitandukanye.”

Kabiriti Asmani asemura ururimi rw’icyarabu uyu munyemari wo muri Arabia Saudite avuga yatangaje ko agace ka Mugandamure ku bwe ahashaka impinduka.

Umunyamabanga Nshingwabikorwa w’intara y’Amajyepfo Izabiriza Jeanne nawe wari waje muri ibi birori byo gufungura ibikorwa by’amajyambere bigiye gushyirwa i Mugandamure, yasabye ko hazashyirwa isoko rya kijyambere.

Uyu munyemari wari uhari ibi byifuzwa ko hashyirwa isoko maze hakava akajagari kari kahasanzwe nabyo yabyakiriye vuba atangaza ko iryo soko naryo aribemereye.

Abagore bari basanzwe bakorera muri iri soko ariko bibumbiye mu matsinda atandukanye bahawe miliyoni eshanu z’amafaranga y’u Rwanda kugira ngo nabo bavugurure ubucuruzi bari basanze bakora.

Bamwe mu batishoboye batuye muri aka gace baguriwe ubwisungane mu kwivuza ndetse bahabwa n’amasuka yo kwifashisha mu buhinzi.

Umuyobozi w’Akarere ka Nyanza Murenzi Abdallah yashimye ko iterambere abayisiramu bagezeho mu Rwanda barikesha umukuru w’Igihugu Paul Kagame.

Ati “Mbere ya jenoside kwitwa umuyisiramu byari ikibazo ku buryo bamwe bahinduraga amazina kugira ngo bakunde babeho ariko umukuru w’igihugu yabikuyeho.”

Uyu mugabo wo muri Arabia Soudite yirinze gutangariza itangazamakuru agaciro k’amafaranga azatangwa muri ibyo bikorwa.

Jean Pierre Twizeyeyezu