Mu ntangiriro za 2014, nibwo Ntasoni yinjiye mu mwuga w’ububaji, nyuma yo kubona ko ibi bikoresho biva mu mbaho bikomeza gukenerwa, ni mu gihe kandi yumvaga abifitiye ubushobozi ko n’umugabo we abimufashamo aho yatangiranye igishoro cya Milliyoni 6Frw.

Agira ati “Nize mu ishami ry’ibinyabuzima n’ubutabire mu mashuri yisumbuye, ndangije kwiga mbura akazi nibwo nabonye ko ngomba kwihangira umurimo njya mu bubaji ntangira ngura imashini n’umufasha wanjye abimfashamo none ubu maze kwigeze kuri byinshi kuko simbura ibihumbi bisaga magatatu ninjiza ndetse ubu maze kwiyubakira inzu ifite agaciro ka miliyoni zisaga 20.”

Mu bikoresho akora harimo intebe, ibitanda, ameza no gucuruza imbaho n’ibindi bikoresho bituruka mu bubaji, aho kuri ubu akoresha abakozi batandatu.

Uwimbabazi Jean Pierre ni umwe muri abo bakozi bakora muri atelier ye. avuga ko mu gihe amaze akora na we byatumye agira ubushobozi bwo kuba atunze umuryango we.

Ati “Ubu mbasha kubika amafanga ibihumbi 15 buri kwezi, kandi kuba nkoreshwa n’umugore nta pfunwe bintera, kuko icya mbere nzi icyo nshaka.”

Ntasoni avuga ko ubu afite gahunda yo kugura imodoka izajya imuzanira ibikoresho, mu rwego rwo gucyemura ikibazo cyo guhora akodesha.

Ati “Ndasaba abagore bagenzi be gukora imishinga yabateza imbere, barushaho gutinyuka gukora imishinga bitaga ko ikorwa n’abagabo harimo n’uyu w’ububaji dore ko niteguye gufasha kwiga nta kiguzi uyu mwuga umugore wese uzangana abishaka.”

Mbarushimana Theogene n’umugabo wa Ntasoni arasaba abagabo bagenzi be kujya batera inkunga abagore babo mu gihe bagize igitekerezo cyo gukora umwuga uwo ari wo wose ugamije kuzanira umuryango inyungu.

Egide Kayiranga