Ndagijimana avuga ko yari atunze inka zigera ku 10 zitatangaga umusaruro aguramo inka imwe ya kijyambere, ubu ikaba imaze kumuteza imbere ku buryo bugaragarira buri wese.

Ati “nari noroye inka zigera 10, ugasanga nta litiro 3 mbonamo, ariko aho mfatiye icyemezo cyo kuzigurisha nkagura iyi nka imwe, ubu buri munsi nkama litiro 20 z’amata zinyinjiriza amafaranga 4000 ku munsi”.

Avuga ko iyi nka yayiguze ibihumbi 300 ikiri akanyana, kugeza ubu ngo imaze kubyara inshuro 3, iyo itetse ngo afata inyana yayo akayigurisha amafaranga atari munsi y’ibihumbi 400 ubuzima bugakomeza.

Uyu mugabo utuye mu mudugudu wa Nyarusange mu kagari ka Nyamagana mu murenge wa Ruhango, avuga ko aho atangiriye korora iyi nka, amaze kwigurira ikibanza akaba amaze no kucyubakamo inzi nziza, akaba yaramaze kwimura umuryango we aho yari atuye mu cyaro ubu bakaba batuye ahagejejwe amajyambere.

Nishyirembere Lina ni nyina wa Ndagijimana, avuga ko ubu umuryango wabo nta kibazo nta kimwe bagihura nacyo kubera iyi nka, avuga ko mbere bagifite inka nyinshi bahoranaga ibibazo byinshi, ariko ubu ngo bameze neza abana baranywa amata, kandi bakanasagurira isoko.

Uyu mukecuru avuga ko iyi nka ikamwa litiro 20, ngo n’uko batayigaburira nk’uko bikwiye, naho ngo ifite ibiryo bihagije yanarenza izi litiro.

Ndagijimana aragira inama abandi borozi ndetse n’ababiteganya guhindura imyumvire, bakareba kure batekereza ku bworozo bwabateza imbere. Uyu muryango uratangaza ibi nyuma y’aho Leta yagiye ikangurira abantu kureka ubworozi bwa gakondo ahubwo bakorora kijyambere.

Eric Muvara