Mu ruzinduko Perezida Kagame yagiriye muri aka karere kuri uyu wa gatanu tariki 11 Nzeri 2015, umuyobozi wako Murenzi Abdalha yagaragaje ko bafite umusaruro ugera kuri litiro ibihumbi 40 ariko ubushobozi bwabo ntiburenze gutunganya litiro ibihumbi 10.

Perezida Kagame yakiranywe urugwiro n’abatuye akarere ka Nyanza no mu nkengero zako

Yasobanuye ko ayo mata bayatungnyiriza mu ruganda rumwe runini n’izindi ebyiri ntoya ariko nazo zikaba zidahagije.

Ntakirutimana Isac umuhinzi mworozi muri aka karere nawe yagaragaje ikibazo cy’umuhanda ubangamiye ibikorwa byo gutwara umusaruro, byose Umukuru w’igihugu akaba yemeye ko bidatinze biba byabagezeho.

Perezida Kagamye yabemereye uruganda rutunganya umusaruro w’amata n’umuhanda wo kongera ubuhahirane.

Ku kibazo cy’uruganda rw’amata Parezida kagame yabwiye Abanyenyanza ko bidatinze uruganda rutangira kubakwa.

Yagize ati “Tuzatinzwa gusa no gutumiza ibyuma hanze, kuko ntabyo twikorera, ariko kuba umusaruro uboneka si ikibazo ahubwo ni ibisubizo.”

Abaturage b’akarere ka Nyanza no mu nkengero zako bari baje kumva impanuro z’umukuru w’igihugu.

Perezida kagame yabwiye yavuze ko uruganda ruzubakwa rushobora kujya rurenza gutunganganya litiro ibihumbi 30 byapfaga ubusa, abasaba ko ahubwo barushaho kongera umusaruro.

Umukuru w’igihugu yashimiye abaturage ba Nyanza uburyo bitabira ibikorwa by’iterambere no kurushaho kwitabira kwiga, aho yashimiye umuturage w’imyaka 34 y’amavuko urangije amashuri yisumbuye kandi akuze.

Perezida Kagame yanafashe akanya ko kureba bimwe mu bikorwa by’iterambere abatuye aka karere bagezeho.

Ephrem Murindabigwi