Senateri Ntawukuriryayo Jean Damascène wari uyoboye izo ntumwa za rubanda yatangarije ubuyobozi bw’akarere ko basanze imashini zazanywe muri uru ruganda zaratangiye kurwara umugese bityo bakaba batizeye ubuziranenge bwazo, kuko imashini zo ku rwego nk’urwizashyizwe muri urwo ruganda ubundi zitwarwara umugese.

Imashini nshya zamaze gutora umugese zirasabirwa gusuzuma ubuziranenge.

We na ba depite Ngabo Amiel na Manirarora Annoncée, bavuga ko uko babonye izo mashini byabateye impungenge ko zishobora gutanga ifu yanduye cyangwa ihumanye, bityo basaba ko rwazagenzurwa mbere yo gutangira imirimo.

Ibindi byagaragaye kuri uru ruganda ni uko rwashyizwemo umuriro w’amashanyarazi udakwiranye narwo ndetse rukaba rudafite amazi, maze basaba ko byose byakosorwa mbere y’uko rukora. Banavuze kandi ko mu murenge uruganda rwubatswe mo nta myumbati ihagaragara bityo bagasanga abaturage batararuhaye agaciro, bakanibaza niba umusaruro ruzatunganya uzaboneka.

Izi mashini zatoye umugese zitaratangira gukora.

Uru ruganda rwatangiye kubakwa mu mwaka wa 2011 biteganyijwe ko imirimo yo kurwubaka yari kurangirana n’umwaka wa 2012. Nyuma ubuyobozi bw’akarere ngo bwasanze imashini zatumijwe kurukoresherezwamo zari zifite ubushobozi bukeya maze bahagarika isoko batanga irindi bundi bushya.

Imashini zifuzwaga zimaze amezi 5 zigeze muri uru ruganda ariko ntirwigeze rutangira gukora kugeza ubwo izi ntumwa za rubanda zisabiye ko rubanza gusuzumwa, n’ubwo n’ubundi nta cyerekana ko rwari rwiteguye gutangira imirimo.

Nta mazi arashyirwa mu ruganda n’ingufu z’amashanyarazi ntizihagije.

Imirimo yo kubaka uruganda yagombaga kurangira muri 2012 ariko n’ubu ntirarangira.

Muri aka karere hakomeje kugaragara ikibazo cy’ibikorwa remezo bitarangirira igihe harimo n’uru ruganda rugitegerejwe na benshi.

Ernest kalinganire}