Inguzanyo iyi koperative itanga ni iz’imishinga itandukanye harimo iciriritse ibyara inyungu, imishinga y’ubworozi, ubuhinzi ndetse niyo kubaka amazu.

Nk’uko bamwe mu bafashe iyi nguzanyo babitangaza, ngo koperative “umwarimu SACCO” yaje iba igisubizo ku bibazo by’urusobe barimo byaterwaga n’umushahara udahagije utari ujyanye n’ibiciro biri ku masoko.

Habineza Théogene ukorera mu murenge wa Karembo ho mu karere ka Ngoma, avuga ko yiteje imbere abikesheje inguzanyo yatse muri Koperative “Umwarimu SACCO” maze akabasha gukora umushinga wunguka.

Yagize ati “twebwe abarimu turashima iyi koperative yacu kuko yabaye igisubizo ku iterambere rya mwarimu. Nkanjye natangije igishoro cy’amafaranga ibihumbi 100 nagujije muri koperative yacu ariko ubu maze kugera ku gishoro cya miliyoni enye”.

Abarimu ariko bavuga ko n’ubwo “umwarimu SACCO” yabagejeje kuri byinshi, iyi koperative itabashije gukemura ibibazo byose kuko n’ubu hari ahakiri imbogamizi zirimo ko inguzanyo zitarabasha kugera kuri bose.

Uretse uyu mwarimu witeje imbere mu nguzanyo yatse agakora ubucuruzi, ngo hari n’abandi benshi bagiye baka inguzanyo bakiteza imbere bitewe n’uko koperative “Umwarimu SACCO” ibaha inguzanyo ku nyungu nke ya 11% nk’uko bitangazwa n’ubuyobozi bwayo.

Museruka Joseph, uyobora Koperative “Umwarimu SACCO” avuga ko koperative ayobora yahaye inguzanyo abarimu ibihumbi 44 ku barimu ibihumbi 60 b’abanyamuryango.

Yongera ho ko inguzanyo zagiye mu bucuruzi buciriritse zigera kuri miliyari 35 zahawe abarimu mu Rwanda kandi ko bagenda biteza imbere.

Uyu muyobozi kandi nawe yemera ko hakiri imbogamizi zirimo kuba itarabasha gutanga inguzanyo ku banyamuryango bose kuko habarwa abagera ku bihumbi 17 batarafata inguzanyo.

Yabisobanuye agira ati “Koperative imaze imyaka itandatu ikora ntago twaba tugeze kuri uwo mubare nk’uko tuwifuza kuko ntawuvuka ngo ahite yuzura ingobyi. Igishimishije ni uko na koperative yacu yunguka kuko umwaka ushize twungutse agera kuri miliyari imwe na miliyoni 73”.

Koperative Umwarimu SACCO yatangiye gukora kuva mu mwaka wa 2008 kugera ubu amahanga akaba aza gukora ingendoshuri ngo nabo babe bashyiraho koperative nkizi iwabo zigamije guteza imbere abarimu.

Jean Claude Gakwaya