Abantu 20 barimo bahuguwe tariki 25/09/2014 nibo bazakora ayo mavomo mu gihe yangiritse kugira ngo abaturage batazongera kujya kuvoma kure kandi ashyirwaho ari cyo cyari kigenderewe; nk’uko byemezwa na Ndayambaye Innocent ukuriye ibikorwaremezo muri WASAC by’umwihariko umushinga wa Wash Project.

Nubwo bungutse ubumenyi bwihariye mu gusana ayo mavomo akoreshwa n’ipompo azwi nka “borehole”, ariko hari ikibazo cy’ibikoresho byo gusimbuza ibyagize ikibazo bitaboneka mu gihugu bigomba gutumizwa hanze. Biteganyijwe ko nyuma yo kunguka ubwo bumenyi bagomba kubitumiza kugira ngo amavomo atatu yapfuye asanwe.

“Ikibazo cyari gisanzwe ni uko borehole yapfaga ubwo byabaga birangiye, investissement yashyizwemo yo kuyubaka ni nk’aho yabaga irangiye ba baturage bahavoma ntibongera kubona amazi, bongera kujya kuvoma kure kandi ari byo twari twanze mbere,” Ndayambaje Innocent.

Ayinkamiye Donatha, umubyeyi utuye hafi y’iryo vomo mu Kagali ka Bukinanya mu Murenge wa Cyuve avuga ko bakoresha isaha kugira ngo babone amazi ariko kuva bakwegerezwa iryo vomo ngo baruhutse cyane.

Ndayambaje Innocent akangurira abaturage bagize amahirwe yo kwegerezwa ayo mazi gufata neza ayo mavomo barinda abana kuyangiza bitendekaho kandi banajugunyamo imyanda yanduza amazi.

Imibare yo mu ibarura rusange ry’abaturage n’imiturire igaragaza ko hafi 88% by’Abanyamusanze bagerwaho n’amazi meza. Umushinga wa Wash Project wubatse amavomo 29, icyenda mu Karere ka Burera, 10 muri Musanze na Rubavu 10.

Nshimiyimana Leonard