Mu nteko rusanjye yahuje abagize Gicumbi Investement Company yabaye tariki 14 Ukwakira 2015, niho bemeje uyu mushinga wo kubaka hoteli mu mujyi wa Byumba, mu rwego rwo guteza imbere akarere.

Ngirente Milton uhagarariye iyi sosiyete yatangaje ko igitekerezo cyo kubaka inyubako zigezweho bagikuye mu itorero ryahuje abikorera bo mu Ntara y’Amajyaruguru, nyuma kwemeza kwishyira hamwe kugira ngo babashe kubaka hoteli.

Ngirente yavuze ko ku bufatanye bwabo bizashoboka kandi bikagirira akamaro n’abatuye muri aka karere, dore ko umujyi wa Byumba wasigaye inyuma mu iterambere.

Yagize Ati “Twifuza ko mu mezi atandatu gusa haricyo tuzaba tumaze gukora kigaragara netse gifitiye akamaro ubuybozi n’abaturage.”

Ngirente yakomeze atangaza ko buri wese wumva yaba umunyamuryango w’iyi sosiyete amarembo afunguye, kuko umugabane umuntu asabwa kugira ngo yinjiremo ungana na miliyoni imwe y’amafaranga y’u Rwanda.

Mukiza Epaphrose umwe mubikorera bo mu karere ka Gicumbi akaba n’umunyamuryango w’iyi sosiyete wamaze gutangamo umugabane, atangaza ko igikorwa bagiye gukora ari ingirakamaro kandi ko nta gihombo bateganya kuko hari igihe bazatangira kwinjiza amafaranga.

Iki gitekerezo kigiye gushyirwa mubikorwa bari bari banagisabwe na Guverineri w’intara y’Amajyaruguru, Bosenibamwe Aime, mu nama yamuhuje n’abikorera tariki 28 Kamana 2015, aho yasabye abikorera guhuza imbaraga bagashyira hamwe bakubaka ajyanye n’igihe.

Iyi gahunda iramutse ishyizwe mu bikorwa, yizeweho guhindura isura y’umujyi wa Byumba ukirangwa n’amazu ashaje.

Ernestine Musanabera