Tariki 29/04/2013, Minisitiri Murekezi yifatanyije na koperative COMINYABU icukura amabuye y’agaciro mu kagari ka Busoro umurenge wa Nyamyumba akarere ka Rubavu mu rwego rwo kwifatanya nabo kwizihiza umunsi mpuzamahanga w’umukozi wizihizwa taliki ya mbere Gicurasi, kuza kureba ko mu bucukuzi bw’amabuye y’agaciro hubahirizwa umutekano w’abakozi hamwe no kureba ko hadakoreshwa abana mu gucukura amabuye agaciro.

Minisitiri Murekezi ashima uburyo iyi Koperative yashoboye kugira imikorere myiza mu
kubahiriza ubucukuzi bw’amabuye y’agaciro. Koperative COMINYABU icukura yita mu kurengera ibidukikije hamwe no kuteza imbere aho ikorera.

Minisitiri w’abakozi ba Leta avuga ko iyo umuturage akora akibeshaho ashobora no kubeshaho igihugu cye imwe mu ndangagaciro yagombye kuranga Abanyarwanda.

Mu myaka irindwi Koperative COMINYABU imaze ikora ikoresha abakozi 282, ikaba igeze aho
icukura toni 30 za Gasegereti, Wolfram na Colta ku mwaka; umwaka wa 2012 yashoboye kwinjiza amafaranga miliyoni 118.

Aya amafaranga atari macye ngo yatumye abakora mu bucukuzi bw’amabuye y’agaciro muri Nyamyumba biteza imbere kuko arenga miliyoni 90 zagumye mu bacukuzi bafite Koperative bagasaranga ayo baba binjije batarebye uwacukuye menshi cyangwa macye ahubwo bakorera hamwe.

Minisitiri Murekezi ashima abaturage bafite umurava mu kongera umusaruro w’amabuye y’agaciro kuko agaciro kabo kagaragarira mu kongera umusaruro w’ibyo bakora kandi bakagira inyungu ku gihugu.
Minisitiri Murekezi avuga ko kwitabira umurimo no kuwukora neza bigira inyungu ku gihugu. Akavuga ko umwaka wa 2012 u Rwanda rwinjije amadovizi arenga miliyoni 160 z’amadolari zivuye mu bikorwa bikorwa n’abaturage.

Nubwo ashima abakozi bitabira umurimo, Minisitiri Murekezi avuga ko umukozi acyeneye umutekano mu kazi no guhabwa ibyangombwa acyenera.

Yashimye uburyo abakozi ba COMINYABU bafite ibikoresho mu gucukura n’uburyo umutekano w’abacukura witabwaho kuburyo kuva ubu bucukuzi bwatangira muri Nyamyumba ntawe urangwa mu mpanuka.

Sylidio Sebuharara