Muri rusange ubukungu bwariyongereye kurusha imyaka yashize nk’uko Umuyobozi wa NISR, Yusuf Murangwa yabitangaje mu kiganiro MINECOFIN yagiranye n’abanyamakuru ku wa 17 werurwe 2015, aho agaragaza ko umuvuduko w’ubukungu urimo kwiyongera kuri 7%.

Inzego n’abantu ku giti cyabo bakora serivisi nibo bakoreye amafaranga menshi yihariye 47% by’umusaruro wose wabonetse mu mwaka ushize, ubuhinzi bwatanze 33%, inganda zivamo umusaruro uri ku kigero cya 14%, naho 5% yavuye mu gusonerwa imisoro n’ibindi bikorwa.

Ikindi cyatumye amafaranga yabonetse agirira akamaro abayakoreye nk’uko MINECOFIN na NISR babigaragaza, ni ukuba ifaranga ry’Igihugu ridata agaciro kuko mu kwezi kwa mbere k’uyu mwaka, ryagataye kuri 1.4%, mu kwa kabiri kwakurikiyeho ritakaza agaciro kuri 0.7%.

Ibi na none ngo byatumye ibiciro by’ibiribwa bigabanukaho 0.3%, iby’ingendo no gutwara ibintu byo bigabanuka cyane kuri 4.3%.

Mu byiciro byatanze umusaruro muke harimo inganda zahombye 1% by’ayo zatangaga ugereranyije n’umwaka ushize. Minisitiri Amb Claver Gatete n’abandi bakozi muri MINECOFIN bagaragaje ko byatewe ahanini no kubura umuriro w’amashanyarazi n’ibyo zitunganyamo ibintu zikora.

MINECOFIN yemera kandi ko umusaruro wabonetse wavuye mu maboko y’abantu bake ariko ngo irimo gukorana n’izindi nzego zitandukanye kugira ngo abashomeri benshi babone imirimo, hakaba no kongerera ubushobozi abakozi ndetse no gukora ubukangurambaga kugira ngo abantu barusheho kuzigama.

Minisitiri Gatete yongeraho na gahunda yo gufata ubwishingizi bwo kwivuza bwa Mituelle de santé, ndetse n’ibikorwa bitandukanye bigamije gukura abantu mu bukene.

Simon Kamuzinzi