Mu buhamya bwe, Mbarushimaba avuga ko yarangije amashuri yisumbuye mu mwaka wa 2012 ubuyobozi bw’umurenge bukabakangurira kwishyira hamwe bakizigama biciye mu bimina bita umutamenwa ni uko arabyitabira.

Muri iryo tsinda ryo kubitsa no kugurizanya avuga ko batangaga amafaranga 200 yo kuzigama n’igiceri cya 50 cy’ingoboka inshuro ebyiri mu kwezi. Icyo giceri ngo bateganyaga ko cyagoboka nk’umuntu wagize ibyago bamutabaye cyangwa umuntu wagize ibirori bakamutwerera.

Avuga ko yaje kuguza amafaranga ibihumbi 25 muri iryo tsinda nawe yongeraho ibihumbi bitanu ni uko aza gutangira ubucuruzi. Ngo yatangiye acuruza butike irimo utuntu duke duke arongera aguza ibihumbi 15 muri rya tsinda rye aza kubona ibintu bigenda byiyongera.

Muri ubwo bucuruzi bwe avuga ko inyungu yakuragamo yahitaga ayigura itungo bityo bityo ubu akaba afite ubworozi bw’ingurube yoroye mu buryo bwa Kijyambere zigera mu 9.

Uyu Mbarushima kandi yanitabiriye ubuhinzi bw’ibirayi aho ubu yabashije guhinga kuri hegitare zigera mu bihumbi bitatu. Kuri we rero asanga urubyiruko rushobora gutangirira ku gishoro gito buke buke bikajyenda byiyongera.

Ati “iyo nicara ntabwo mba narageze kuri ibyo byose mba narakomeje gushaka akazi wenda sinakabone”.

Umuyobozi w’akarere ka Gicumbi, Mvuyekure Alexandre we avuga ko urundi rubyiruko rurangiza amashuri yisumbuye rwari rukwiye kwigira ku bantu nka Mbarushimana bityo nabo bakiteza imbere.

Asanga ubumenyi bafite bari bakwiye kubukoresha bagana ibigo by’imari birimo za Sacco kugira ngo babahe igishoro babashe kwihangira imirimo.

Yagarutse ku kuba urubyiruko rurangiza ubu rukabura icyo rukorora usanga rwishora mu biyobyabwenge no mu zindi ngeso mbi.

Gusa ngo mu biganiro bizajya bihabwa abanyeshuri bagiye kujya mu rugerero harimo no kubigisha uburyo bagomba kuzitabira gahunda ya Kora Wigire biga imishinga mito iciriritse kugira ngo babatere inkunga.

Ernestine Musanabera