Abahawe ihene ni abatishoboye bafashijwe kuva muri nyakatsi. Izi hene zizabafasha kwinjira mu buzima bushya kuko zizafasha abaturage kugira imibereho myiza harwanywa imirire mibi irimo na bwaki.

Abahawe itungo barasabwa kuzoroza abandi kugira ngo Abanyarwanda bafashanye kwihutisha iterambere n’imibereho myiza.

Habarurema Isaie ni umuyobozi w’akarere ka Gatsibo wungirije ushinzwe imari n’ubukungu n’iterambere. Arasaba abaturage bahawe izo hene kuzifata neza birinda kuzigurisha kuko bazihawe kugira ngo zibafashe guhindura ubuzima. Ibi yabivuze kubera ko hari abazihabwa bakumva ko ari izabo bakazigurisha biyibagije ko bagomba koroza abandi.

Muri iki gihe leta ishyize imbere gahunda yo gukura abaturage mu bukene hitawe cyane ku gukemura ikibazo cy’imirire mibi. Gahunda izwi cyane muri iyi minsi ni iya girinka munyarwanda ifasha abaturage kubona amata ndetse n’ifumbire.

Sylidio Sebuharara