Abacukuzi b’amabuye y’agaciro ntibahembwa amafaranga amwe buri kwezi kuko bahembwa bitewe nuko amabuye yabonetse, ariko ngo arahagije ku buryo batagihangayikishwa no kubona igitunga imiryango yabo.

Pierre Celestin Ndacyayisenga ukorera muri Enterprise Sindambiwe Simon avuga ko hari igihe haboneka amabuye menshi ugasanga hari igihe ukwezi gushobora kurangira agahembwa amafaranga ibihumbi 700 kuburyo bimaze kumuteza imbere mu myaka ibiri amaze akora kano kazi.

Ati “ninjiyemo ndi umuntu w’umusore mbasha kugura umudugudu ku bihumbi 300 kandi warimo n’inzu yubatse, mu mwaka ukurikiyeho nabashije gucyuza ubukwe nyuze mu mategeko neza, mbasha no guteramo ibiti 180 bya kawa kuburyo iyo nicaye hano mba nteganya ko n’umukozi mpemba wo kuzikorera ariyo mu rugo nta kibazo”.

Daniel Ngirimana afite imyaka 25 akaba amaze umwaka umwe akora akazi k’ubucukuzi bw’amabuye y’agaciro muri Enterprise Sindambiwe nawe yemeza ko mu gihe amaze afite byinshi amaze kwigezaho mu gihe gito amaze atangiye kano kazi.

Ati “byamfashije kwizigama kuko mbona amafaranga nkabasha kubitsa kuri konte nkabona n’utundi two kurya nkaba mfite n’ikawa nakoresheje harimo ibiti 600 kandi birimo birera hakaba harimo abakozi bagenda bazibagarira nkabahemba amafaranga nkuye hano”.

Ngirimana kandi ngo nta mpungenge agira ko ikirombe gishobora kumuridukiraho kuko yemeza ko biba byubakiye neza kandi mu buryo bwizewe bityo bikaba nta kibazo bimutera.

Uretse kuba abacukuzi b’amabuye y’agaciro bamaze gutezwa imbere n’ubucukuzi bwayo ngo n’abaturage baturiye ibirombe babyungukiramo kuko ibyo bacuruje bigurwa n’abacukuzi ku buryo n’utagurishije abasha gukorera abacukuzi mu ikawa zabo akabona amafaranga nkuko byemezwa na Simon Sindambiwe nyiri Enterprise Sindambiwe Simon ikora ubucukuzi bw’amabuye y’agaciro.

Ati “inyungu ya mbere ni uko abakozi nkoresha hafi ya bose baturiye hano, ikindi ni uko ufite ka botike arara agurishije, ikindi kandi ni uko abaturage bunguka kuko abakozi nkoresha ku munsi w’umuganda duteranira ahantu hamwe kuburyo nk’imihanda yose yakozwe Leta yagiye idufasha ariko natwe dushyiraho akacu”.

Mu karere ka Gakenke habarirwa imirenge itari mice ikorerwamo ubucukuzi bw’amabuye y’agaciro yiganjemo Gasegereti, Colta hamwe na Wolfam.

Abdul Tarib