Sembagare avuga ko abatishoboye basigaye kugabirwa inka ari bake kuko muri rusange bateganya kugabira abatishoboye inka ibihumbi 93.

Abamaze kugabirwa inka harimo abazigabirwa n’ubuyobozi bw’akarere ka Burera nyir’izina ndetse n’abandi bazigabirwa n’abafatanyabikorwa b’ako karere ndetse n’indi miryango ifasha abatishoboye.

Abamaze kugabirwa inka iyo zimaze kubyara nabo baziturira bagenzi babo; nk’uko Sembagare abisobanura. Akomeza ahamya ko inka ifitiye Abanyaburera akamaro gakomeye kuko ifatwa nk’uruganda, abayifite bakagira imibereho myiza.

Agira ati “Inka ni nk’uruganda kuko ikamwa amata, umuryango ukanywa amata, ariko iyo abaye menshi bakayagurisha, azana amafaranga.”

Sembagare akomeza avuga ko inka itanga n’ifumbire. Iyo umuturage afite inka imuha ifumbire akayifumbiza mu murima bityo umusaruro ukiyongera akabona ikimutunga ndetse akanasagurira amasoko.

Akomeza avuga ko kandi inka ituma umuryango uyifite wikenura mu buryo butandukanye. Iyo inka ibyaye zikaba nyinshi nyirayo agurisha zimwe akabona amafaranga yo kurihira abana amashuri ndetse bakaniyubakira, bagatura heza.

Abagabirwa inka bibutswa ko gahunga ya “Gira Inka” munyarwanda yatangijwe na Perezida w’u Rwanda Paul Kagame kandi abagabiwe inka baba bagiranye igihango na Perezida bityo bakaba basabwa gufatanya kuyorora kugira ngo imererwe neza.

Norbert Niyizurugero