Mu karere ka Burera hatujwe imiryango 29 y’abirukanwe muri Tanzaniya. Mbere y’uko bubakirwa babanje gutuzwa ahantu hamwe: mu murenge wa Nemba ahari imiryango 12 igizwe n’abantu 42 ndetse no mu murenge wa Rwerere ahari imiryango 17 igizwe n’abantu 34.

Zaraduhaye Joseph, umuyobozi wungirije w’akarere ka Burera ushinzwe ubukungu n’iterambere avuga ko bagomba kurangiza kubakira abo Banyarwanda kuburyo mu kwezi kwa 03/2014 amazu yabo azaba asakaye. Bazubakirwa mu murenge wa Rusarabuye, Bungwe, Gatebe na Rwerere.

Abo Banyarwanda birukanwe muri Tanzaniya bakiriwe mu karere ka Burera tariki ya 08/01/2014. Baje bafite ibiribwa bazifashisha mu gihe cy’amezi atatu. Ibyo biribwa bigizwe n’ibishyimbo, ibigori ndetse n’amavuta.

Gusa ariko ubuyobozi bw’akarere ka Burera nabwo bufasha abo Banyarwanda mu buryo butandukanye: babaha ibikoresho bitandukanye byo mu rugo, bafasha abana kujya kwiga ndetse banabafasha mu bijyanye no kwivuza.

Kuri ubu ubuyobozi bw’imirenge, uko ari 17 igize akarere ka Burera, nabwo bwafashe ingamba zo gufasha abo Banyarwanda. Bazajya abasura babazaniye ibyo kurya ndetse n’ibindi bikoresho bakenera.

Aba banyarwanda batujwe mu karere ka Burera ni bamwe mu babarirwa mu bihumbi 14 n’imisago birukanwe muri Tanzaniya muri Kanama 2013. Ubwo abo Banyarwanda bakirirwaga mu ntara y’Uburasirazuba babanje gutuzwa mu nkombi ya Kiyanzi na Rukara ziri mu karere ka Kayonza na Kirehe.

Nyuma haje gufatwa ingamba ko bagomba kwimurwa bakajya hamwe n’abandi Banyarwanda mu turere dutandukanye tw’u Rwanda kugira ngo nabo biyumve ko ari Abanyarwanda kandi ko bari mu gihugu cyabo.

Norbert Niyizurugero