Aba banyeshuri babitangaje nyuma y’iri rushanwa ryabaye ku ncuro ya 5 kuri uyu wa 11 Werurwe 2016, rikaba ryateguwe n’Ikigo cy’igihugu cy’uburezi (REB) ku bifatanye n’Ikigo cy’ubutwererane mpuzamahanga cya Koreya (KOICA), aho bamwe basubizaga ibibazo byanditse, abandi bakerekana imishinga bakoze.

Mu bakoze imishinga, itsinda ry’abanyeshuri batatu bo mu ishuri rya Gashora Girls’ Academy ni ryo ryaje ku isonga nyuma yo kwerekana umushinga (Ram Pumps), wo kugeza amazi mu misozi miremire hatiyambajwe ingufu zidasanzwe.

Mutezinka Sandrine Rebecca wo muri iri tsinda yasobanuye akamaro k’uyu mushinga ku gihugu.

Ati “Umushinga wacu uberanye n’imisozi miremire kandi ntuhenze kuko udasaba moteri cyangwa ingufu z’amashanyarazi kugira ngo amazi azamuke, bityo ukaba wagirira akamaro abaturage b’amikoro make bakeneye amazi”.

Mutezinka ngo yifuza ko uyu mushinga utarangirira mu guhabwa amanota ya mbere gusa, ahubwo ko wabona inkunga ugashyirwa mu bikorwa.

Itsinda ryaturutse muri Ecole des Sciences de Gisenyi, ryekanye uko bakora umuti wica udukoko turimo ibiheri biba mu buryamo bw’amashuri amwe n’amwe ndetse n’imibu, bifashishije urusenda, amata n’amazi cyane ko imiti isanzwe ngo ihenze.

Umwe muri bo, Hakuzimana Samuel, agaruka ku cyo iri rushanwa rimusigiye, ati “Tubonye ko natwe dushoboye kuvumbura ikintu gifite akamaro kandi twigiye no ku bandi ku buryo ubutaha twazaza twarakoze ibindi byiza ndetse tukaba aba mbere”.

Uwari uhagarariye Minisiteri y’Uburezi, Dr Gasinzirwa Marie Christine, avuga ko ibyo aba bana bakora ari intangiriro nziza.

Yagize ati “Abanyenganda bakagombye kubireberaho, bakabyagura bityo bikagirira Abanyarwanda akamaro aho kubireba gusa hanyuma ntumenye aho byahereye”.

Iri rushanwa ryatangiranye abanyeshuri 696 mu ijonjora, rikaba rishoje risigayemo 171 bo mu bigo 61, abitwaye neza bakaba bahembwe mudasobwa ngendanwa, inkoranyamagambo n’ibindi bihembo binyuranye.

Aba banyeshuri baba baratoranyijwe mu bigo by’amashuri byose byifuza kujya mu irushanwa, ijonjora rigakorerwa ku rwego rw’intara, hanyuma bagahurira hamwe ku rwego rw’igihugu.