Ubuyobozi bw’iyi koperative bwo buvuga ko itegeko rigenga amakoperative ryahinduwe manda ikajya ku myaka ine, cyakora umukozi ushinzwe amakoperative mu murenge wa Kamembe asobanura ko atari byo ko ahubwo bashaka kurenganya abanyamuryango ku burenganzira bwabo.

Ubu bwumvikane bucye hagati yabanyamuryango na komite nyobozi muri iyi koperative KOVEPO bwatangiye kugaragara mu nteko rusange yabaye tariki 30/08/2012.

Bamwe mu banyamuryango bavuga ko umutungo wa koperative wacungwa nabi kuko nta genzura rikorwa.

Umuyobozi w’iyi koperative, Ndagijimana Janvier, avuga ko kuba amatora ataba ari uko inama rusange yabyanze kandi n’itegeko rikaba ryarahindutse. Ku kibazo cy’ibarura ry’umutungo avuga ko buri gihebwe abanyamuryango bagaragarizwa uko umutungo wabo uhagaze.

Umukozi ushinzwe amakoperative mu murenge wa Kamembe asobanura ko manda y’inama y’ubuyobozi muri koperative ari imyaka itatu kandi ko ntawemerewe gukora manda zirenze imwe.

Nsengiyumva akomeza avuga ko manda y’abagize inama y’ubugenzuzi ari imyaka ibiri kandi ko nta wemerewe gukora manda ebyiri zikurikirana bityo akaba asanga koperative idafite uburengenzira bwo guhindura itegeko ariyo mpamvu ibirikubiyemo bigomba kubahirizwa.

Koperative KOVEPO yatangiye gukora iyi mirimo yo gucuruza mafi n’ibiyakomokaho kuva mu mwaka 2008, kugeza uyu munsi ifite abanyamuryango 120.

Musabwa Euphrem