Bamwe mu banyamuryango b’iyo koperative bashinja ubuyobozi bwabo imikorere n’imikoreshereze y’umutungo mu buryo budasobanutse, kuko ngo batabanza kubagisha inama no kubaha amakuru. Amakimbirane yatumye imirimo yo kubaka inzu y’ubucuruzi ya COPCOM iri ku Gisozi ihagarara.

Gilbert Habyarimana, Umuyobozi wungirije wa RCA wagiranye inama n’abanyamuryango ba COPCOM ku cyumweru tariki 17/03/2013, yasabye ko aho kugirango koperative isenyuke, ahubwo abanyamuryango bayo bateza impagarara cyangwa abadashaka gutanga umugabane usabwa, ari bo bakwiye gusezera.

Umuyobozi w’akarere ka Gasabo, Willy Ndizeye we yagiriye inama abagize iyo koperative ko aho kugirango bahagarike imirimo ibateza imbere, bafite ububasha bwo gusaba komite nyobozi kuvaho niba ariyo iteza ibibazo, bakitorera abandi bayobozi bibonamo.

Byemejwe ko mu gihe kitarenze ukwezi, inteko rusange ya COPCOM izatora komite ngenzuzi nshya ndetse ikemeza cyangwa igahakana niba na Komite nyobozi ikwiye gusimbuzwa indi.

Bamwe mu banyamuryango bashinja komite nyobozi ya COPCOM gushyigikira ko komite ngenzuzi isanzweho yakomeza igakora kandi ngo yararangije manda yayo, ariko abayobozi ba COPCOM ibi babihakana bavuga ko nta mwanya wabonetse wo gukora ayo matora, bitewe n’uko mu nama ziba habamo kurondogora.

Igishushanyo mbonera cy’inzu y’ubucuruzi ya COPCOM, irimo kubakwa mu murenge wa Gisozi, ahahoze hitwa mu Gakinjiro.

Andi makimbirane yatewe n’uko abanyamuryango bamwe bashinja ubuyobozi bwabo kugira uruhare mu kugura ibikoresho bidakomeye byo kubaka inzu ya koperative, bakaba basaba kuzishyura ba rwiyemezamirimo habanje kugaragazwa inenge z’ibitarakozwe neza.

Abo banyamuryango kandi bavuga ko batazi umubare w’amafaranga ava mu bukode bw’ibibanza bya koperative (igiparikwamo amakamyoneti n’icyigishirizwamo ibinyabiziga), ndetse ngo ntibazi aho ayo mafaranga ashyirwa kuko atavuzwe muri raporo yakozwe na RCA ku mikorere ya COPCOM.

Ubuyobozi bwa RCA bwasobanuriye abo banyamuryango ko bagomba gusaba ibyo bisobanuro komite nyobozi yabo, ariko nayo ntibasha gutanga ibisobanuro bibanyuze kuko idafite umucungamutungo, ndetse ikaba nta n’ibitabo by’iyongeramutungo ifite.

Bamwe mu banyamuryango kandi bagaragaje impungenge bafite z’imigambi COPCOM ifite, yo gusaba inguzanyo ya miliyari ebyiri muri banki ya BRD kugirango irangize inyubako y’ubucuruzi irimo kubakwa, aho bavuga ko bizabagora kuyishyura kuko ngo ari amafaranga menshi, kandi ngo nta gishingirwaho mu kugena uwo mubare ko ariwo ugomba gusabwa.

Iyo koperative kandi yari ifite ikibazo cyo kuzagabana ibyumba by’inzu y’igorofa yayo mu banyamuryango 321 bayigize, kuko bose bashaka kuzafata ibyumba byo hasi ku butaka. Inama yabaye ku cyumweru yashyizeho komite yo kwiga uburyo ibyumba byose byazahabwa abanyamuryango mu buryo bunogeye buri wese.

Simon Kamuzinzi