Ibikorwa byayo byatumye ihabwa igihembo kiri ku rwego mpuzamahanga, ku bwo guhugura no gutinyura urubyiruko mu bijyanye no kwikorera. Igihembo yahawe cyitwa “Grand Prix Spécial de la formation professionnelle au Rwanda", akaba yaragishyikirijwe mu mpera za Nyakanga mu mwaka wa 2023.

Ni igihembo yahawe kubera gutanga amahugurwa no kubera icyitegererezo urubyiruko mu bijyanye no kwikorera. Icyo gihembo cyaherekejwe n’amahugurwa.

Ibi bihembo byatanzwe n’Umuryango witwa CADETFOPI ukorera mu Bufaransa, ukaba usanzwe utanga ibihembo ku bikorera bafite imishinga iteza abandi imbere, ndetse ikabitanga no ku bayobozi mu nzego ziteza imbere ibijyanye n’amahugurwa (Vocational training).

Munezero Lisa Adeline washimiwe nka rwiyemezamirimo wo mu Rwanda wafashe umwanya agahugura abakiri bato bashaka kwikorera, qavuga ko icyagendeweho mu kumushimira ari uko yatanze amahugurwa yigisha urubyiruko kwikorera, bikaba byaratanze umusaruro kuri ‘business’ zabo ".

Aherutse guhabwa irindi shimwe ry’igikombe yagenewe n’Itorero Inganzo Ngari, imbere y’abanyacyubahiro batandukanye n’abakunzi b’iryo torero tariki 01 Kanama 2025 mu gitaramo bise "Tubarusha Inganji" cyabaye ku Munsi w’Umuganura muri Camp Kigali. Icyo gihe Inganzo Ngari yashimiye abagize uruhare mu migendekere myiza y’icyo gitaramo.

Mu bashimiwe harimo kompanyi ML Aspire Group yashinzwe na rwiyemezamirimo Munezero Lisa Adeline, kubera imikoranire basanganywe, bamushimira n’uruhare rwe mu gushyigikira iryo torero n’urubyiruko muri rusange.
.
ML Aspire ni kompanyi yatangiye agisoza amashuri yisumbuye, ahereye ku gucuruza ibikoresho by’ubwubatsi, nyuma igenda yaguka, aho ubu bafitemo igice cya ’Business Consultancy’ n’ikindi cya ’International business trainings’ kuri ba rwiyemezamirimo bakiri bato (Young entrepreneurs).

Inama ku rubyiruko rwifuza kwinjira mu bushabitsi

Munezero Lisa agira inama urubyiruko rwifuza kwinjira mu bushabitsi cyangwa se ubucuruzi, kubanza kumenya icyo bakunda cyane akaba ari cyo bashabikamo.

Ati: "Icya mbere ni ukumenya icyo ukunda (Find your passion), Gutangira ubu ntakuguma gutegereza (Start small with low cost), no Gukomeza kwihangana kandi ukigira ku makosa yawe (Stay resilient and learn from mistakes)".

Munezero yanagiriye inama urubyiruko rugira ubwoba bwo kwikorera, avuga ko kwikorera biryoha, kandi bikaba bibafitiye inyungu. Yavuze ko basabwa kugira ubumenyi bubafasha kwiga isoko n’uko bikorwa kugira ngo bagire ubucuruzi bujyanye n’igihe ndetse bw’umwuga.

Yagize ati: “Icyo nababwira ni uko kwikorera ari ibintu byiza ubu n’ahazaza habo, bagomba guhanga umurimo ariko kugira ngo batere imbere, bakwiye kugira ubumenyi bubafasha kwiga isoko n’uko bikorwa kugira ngo bagire ubucuruzi bujyanye n’igihe ndetse bw’umwuga".