Ishoramari mu Rwanda ryagabanutseho 47.1% muri 2020 - RDB

Ikigo cy’Igihugu cy’Iterambere (RDB), gitangaza ko ishoramari ryinjije miliyari imwe na miliyoni 300 z’Amadolari ya Amerika muri 2020, rikaba ryaragabanutseho 47.1% ugereranyije n’umwaka wa 2019, aho ryari ryinjije miliyari 2.46 z’Amadolari ya Amerika.

Ubuyobozi bwa RDB butangaza ko kugabanuka kw’ishoramari byatewe n’icyorezo cya COVID-19, cyagize ingaruka ku bukungu bw’u Rwanda n’ubw’isi muri rusange.

Inyubako n’nganda byagize 68% by’iryo shoramari ryinjiye, aho inyubako zagize 48% naho inganda zigira 20%. Izindi nzego zazanye ishoramari rigaragara ni ubuhinzi, ikoranabuhanga (ICT), ingufu, ubucukuzi bw’amabuye y’agaciro na serivisi z’imari.

Biteganijwe ko ishoramari rishya rizahanga imirimo 24.703 muri rusange, aho inganda zizatanga imirimo mishya 8,661 naho imyubakire igatanga imirimo 6.372.
Guverinoma y ’u Rwanda ifite intego yo guhanga imirimo mishya 214.000 buri mwaka uhereye ku ishoramari n’andi masoko.

Ishoramari ryavuye hanze y’igihugu rifite 51% by’ishoramari ryanditswe muri 2020, mu gihe abashoramari bishyize hamwe bagize 29% naho ishoramari ry’imbere mu gihugu rigira 20%.

Bimwe mu bikorwa binini by’ishoramari byanditswe muri 2020 birimo Ikigega kimwe cya Acre gifite miliyoni 193 z’Amadolari ya Amerika, Phoenix Plaza miliyoni ifite miliyoni 179 $, Duval Great Lakes Ltd miliyoni 69 $, Sinohydro Corporation Limited miliyoni 66 $, Girinzu miliyoni 41 $, Inyubako ya Petrocom 35 miliyoni $, BBOXX Africa Management Ltd ifite miliyoni 29 $.

Indi mishinga y’ingenzi y’ishoramari yanditswe muri uyu mwaka harimo Miliyoni 12 z’Amadolari ya Amerika za Norrsken Rwanda Ltd yo kubaka ihuriro rinini rya Afurika y’Iburasirazuba mu kwihangira imirimo no guhanga udushya.

Hari kandi miliyoni 4.45 z’Amadolari ya Amerika za Nexus Academy yo gushinga ishuri ryigisha ibijyanye n’indege no gutanga amasomo yemewe mu mahugurwa y’indege no kubungabunga indege, miliyoni 26.2 z’Amadolari ya Amerika azakoreshwa na Bralirwa Ltd mu kwagura aho ikorera no kongera ibicuruzwa bikenerwa mu gihugu ndetse no kohereza ibicuruzwa hanze.

Umuyobozi mukuru wa RDB, Clare Akamanzi, avuga ko nubwo icyorezo cya COVID-19 cyazanbije ibintu, u Rwanda rwakoze ishoramari rikomeye.

Ati “Umwaka wa 2020 wari ingorabahizi ku ishoramari n’ubucuruzi muri rusange. Nubwo ubukungu bwifashe nabi ku isi biturutse ku cyorezo cya COVID-19, u Rwanda rwanditse ishoramari rikomeye mu nzego z’ubukungu. Iki ni ikimenyetso cy’uko abashoramari bakomeje kugirira ikizere u Rwanda ari abo mu gihugu n’abanyamahanga”.

Ati “Turizera ko ishoramari rizakomeza kwihutisha ubukungu mu kuzamura umusaruro bitewe no guhanga imirimo ikenewe ku baturage bacu".

Guverinoma y’u Rwanda yiyemeje gutera inkunga ubucuruzi kugira ngo busubirane binyuze mu kigega cyo kuzahura ubukungu, aho leta y’u Rwanda yagishyizeho miliyari 100 z’Amafaranga y’u mu rwego rwo gufasha ibigo byagizweho ingaruka na COVID-19 gukomeza gukora.

Shakisha izindi nkuru
kigalitoday android app mobile

Ibitekerezo  

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka