Amateka y’urugamba rwo kubohora Igihugu abafasha gusigasira ibyiza bimaze kugerwaho

Yanditswe na

Malachie Hakizimana

7-02-2026 - 11:04' | Ibitekerezo ( )

Abaturage barenga magana atatu bo mu Murenge wa Rubona mu Karere ka Rwamagana bakoze urugendoshuri mu bice bitandukanye bibitse amateka y’urugamba rwo kubohora Igihugu mu Karere ka Nyagatare.

Uru rugendoshuri rwateguwe na kompanyi nyarwanda ya Oldfox Tours and Travel ku bufatanye n’Umurenge wa Rubona. Oldfox ni kompanyi isanzwe itegura ingendoshuri ziganjemo iza Gikristo nk’izo ku butaka butagatifu bwo muri Isirayeli, Egiputa na Turikiya no mu gihugu cy’u Rwanda by’umwihariko mu rwego rwo gufasha ibyiciro bitandukanye gusobanukirwa amateka y’igihugu.

Urugendoshuri rw’aba baturage rwakozwe muri iki gihe u Rwanda rwizihiza ubutwari bw’Abanyarwanda batanze ubuzima bwabo kugira ngo babohore Abanyarwanda ingoyi y’imiyoborere mibi, akarengane, itotezwa n’ubwicanyi bwakorerwaga Abatutsi.

Abitabiriye uru rugendo bari bagizwe n’abayobozi bo mu nzego z’ibanze, abarimu, ababyeyi bakuze, n’urubyiruko rw’abanyeshuri. Bakigera ku mupaka wa Kagitumba bakiriwe n’umuyobozi ushinzwe gusobanura iby’amateka y’urugamba rwo kubohora Igihugu.

Urugendoshuri rwaranzwe n’ibikorwa bitatu: gusura umupaka wa Kagitumba aharasiwe isasu rya mbere ryo gutangiza urugamba ryo kubohora Igihugu ku itariki ya 01 Ukwakira 1990 nyuma y’uko ingabo za RPA zari zihawe amabwiriza n’Umugaba w’Ingabo, Major General Fred Gisa Rwigema.

Hasuwe n’umusozi wa Nyabwishongwezi aho Major General Rwigema yarasiwe arapfa, ndetse hasurwa agace ka Gikoba mu Murenge wa Tabagwe ahaherereye ubutaka bwiswe ‘Agasantimetero’ ari bwo butaka bwa mbere bwafashwe n’ingabo za RPA.

Basuye n’indaki ya mbere y’Umugaba Mukuru w’Ingabo za RPA-Inkotanyi, Major General Paul Kagame yubatswe mu gihe ingabo za RPA zarimo zisuganya ngo zihindure uburyo bw’imirwanire.

Kanyana Mutoni Nikita w’imyaka 17 ni umunyeshuri muri Agahozo Shalom Youth Village. Yavuze ko umurava n’ubutwari byaranze ingabo za RPA zabohoye Igihugu byamusigiye umukoro wo gutera ikirenge mu cyabo cyane ko aho Igihugu ubu gifite ibyo urubyiruko rukeneye bihagije.

Mutsinzi Theophile, umuturage wa Rubona, avuga ko kwigira amateka aho yabereye bizamufasha gushishikariza inshuti n’abaturanyi kugira uruhare mu kurushaho kugira uruhare mu gusigasira ibyiza Igihugu kimaze kugeraho.

Mukashyaka Chantal , Umunyamabanga Nshingwabikorwa w’Umurenge wa Rubona, yavuze ko gusobanukirwa amateka y’urugamba rwo kubohora igihugu bifasha abaturage kurushaho gukunda igihugu no kubitoza abazabakomokaho.

Uwera Winnie, Umuyobozi Mukuru w’Ikigo gitegura ubukerarugendo Oldfox, yavuze ko kumenya amateka y’Igihugu by’umwihariko ubutwari bwaranze ababohoye Igihugu bifasha Umunyarwanda wese kugira ishyaka n’umurava mu byo akora byose adacika intege ndetse akarinda neza ibyagezweho.

Oldfox Tours and Travel ifite intego yo gukora ingendoshuri nyinshi mu rubyiruko, abikorera, imiryango itari iya Leta n’ibindi byiciro byo mu nzego za Leta kugira ngo basobanukirwe amateka y’Igihugu bamenye aho kiva n’aho kigana.