Iyi Koperative kandi yahawe ibitabo bikubiyemo amoko y’inyoni kugira ngo izajye imenya amoko y’inyoni ziri mu gace ikoreramo ndetse n’izimutse zikaza aho ari nshya kugira ngo babone uko bazajya bayobora abakerarugendo babasuye.

Majyambere Florent, uhagarariye Nyabihu Tourism, yavuze ko ibikoresho bahawe bizabafasha kumenya inyoni zikunze kuza mu gace barimo bitewe n’igihe runaka. Yongeyeho ashimira cyane RDB yabatekereje ku bufatanye n’akarere ka Nyabihu bakaba barabageneye ibikoresho bizabafasha mu kazi.

Majyambere yemeza ko ubukerarugendo bufite akamaro kuri koperative yabo kuko abaza gusura inyamaswa bishyura amafaranga afasha abaturage bahaturiye cyane cyane ababa muri koperative gukemura ibibazo nko gutanga ubwisungane mu kwivuza, kubona isabune yo gukaraba n’ibindi.

Majyambere ahamagarira abaturiye ibiyaga, amashyamba, ibishanga kurushaho kubirinda no kurwanya icyo ari cyo cyose cyahungabanya ibinyabuzima byaba ibiba mu mazi cyangwa mu mashyamba kuko ari umutungo mwiza w’igihugu uzana amadevize bityo hakabaho iterambere.

Nyabihu Tourism cooperative yavutse nyuma yo kubona ko ubuhinzi atari wo mwuga wonyine wazamura umuntu ko ahubwo n’ubukerarugendo ari umwuga mwiza wazamura nyirawo igihe awukoze neza.

Ku bufatanye na RDB aba baturage basanze muri Nyabihu hari uduce twinshi nyaburanga ndetse banabona ko hari amoko menshi meza y’inyoni n’ibiyaga nka Karago, Cyunyu, n’ikiyaga cya Nyirakigugu ndetse n’igishanga kitwa Hinga bikwiye kurushaho kwitabwaho bikabyazwa umusaruro.

Bimwe mu bikorwa bakora harimo kwerekana inyoni nziza cyane ziba mu Rwanda by’umwihariko mu Karere ka Nyabihu ndetse banagamije no kwigisha abaza babagana kuroba kuko benshi baba batabizi.

Iyi koperative ifite abayobora abakerarugendo”guides” bagera ku 10 n’abanyamuryango bagera kuri 200.

Safari Viateur