Umwe mu Banyekongo waganiriye na Kigali Today yadutangarije ko bazanye inka zigera kuri 700 kandi ko mu byumweru bibiri bamaze mu Rwanda bashima uburyo bageze mu Rwanda bakakirwa neza kandi bakaba babanye neza n’Abanyarwanda.

Gusa impungenge aba Banyekongo bahuriraho ni uko ngo bahawe igihe gito cyo kuba bacumbikiwe n’inka zabo. Ukwezi kumwe bahawe ngo babe batekereza ku cyakorwa ngo ni guto kuko inka bafite zitaba zigurishijwe zose kandi n’umutekano wo mu gihugu cyabo ukaba ukiri mucye.

Kugeza ubu ikibazo kinini bibaza ni uburyo bazabigenza kuko barimo kugerageza kugurisha inka zabo ariko kubera ko ari nyinshi bakaba banafite impungenge ko ukwezi kwashira zigihari.

Aba Banyekongo bavuga ko baturutse mu duce twa Rumangabo ,Bunagana, Runyoni, Rugari n’ahandi. Bakaba barahungishije inka zabo,kubera ko ingabo za Congo zari zikomeje kuzirya.

Ku bijyanye n’imibereho yabo, bavuga ko bafite ikibazo cy’ibiribwa aho batunzwe n’amata bakama mu nka zabo.

Abanyarwanda batuye mu gace ka Gishwati bavuga ko babanye neza n’abo Banyekongo gusa ngo ikibazo kimwe gihari ni uko wenda inka zabo zakwanduzwa indwara runaka n’izo zavuye muri Congo cyangwa se sikazimiriramo bitewe nuko aho baragira henda guhura.

Kuri iki kibazo, ushinzwe ubworozi mu murenge wa Bigogwe, Kubwimana Joyeuse, avuga ko mbere ya byose inka zaturutse Congo zabanje gukingirwa indwara kandi babujije Abanyarwanda kwegereza inka zabo aho izo ziri.

Kuri ubu, inka zaturutse muri Congo zose zambaye amaherena y’umuhondo naho iz’Abanyarwanda zambaye asa n’icyatsi kandi zikaba zirisha ahantu hatandukanye.

Safari Viateur