MINAGRI yateguye igishushanyo mbonera kizafasha u Rwanda kugeza ku musaruro wa toni ibihumbi 155 mu 2017; nk’uko bitangazwa na Ernest Ruzindaza, Umunyamabanga uhoraho muri MINAGRI.

MINAGRI irifuza kuzamura umubare w’uburyo Abanyrwanda barya amafi ukava ku kigero cya 2.1% ukarenga umubare w’Ikigo Muzamahanga kita ku mirire (FAO) uri 8%.

U Rwanda rusarura toni zitarenze 16 z’amafi ku mwaka gusa, mu gihe rutumiza hanze izigera 25; bisobanuye ko hari ikinyuranyo cya toni icyenda kugira ngo haboneka umusaruro uhagije wahaza Abanyarwanda.

Mu kiganiro n’abanyamakuru cyabaye kuri uyu wa kane tariki 27/06/2012, nyuma y’uko Inama y’Abaminisitiri yemeje iki gishushanyo mbonera, Ruzindaza yavuze ko amafi menshi atumizwa hanze kandi hari uburyo u Rwanda ruzayiyororera.

Ati: “Tuvana amafi menshi hanze kandi dufite ubushobozi bwo kwikorera ayacu n’abaturage bacu bakabona akazi”.

Ubwo buryo bwo gukora amafi ni ugukora umurama uterwa mu byuzi, gutubura umusaruro no gushyiraho ububiko kabuhariwe mu kubika amafi bwanifashishwa mu kuyacuruza; nk’uko iki gishushanyo mbonera kibigaragaza.

Kugeza ubu hamaze gushyirwaho ahantu hatatu hazajya hakusanyirizwa amafi mu gihugu ; i Sake mu Burasirazuba, i Musanze n’Isoko rya Nyandungu (Free Trade Zone).

Emmanuel N. Hitimana