Abayobozi b’aya makusanyirizo ku wa 19 Mutarama 2023, bahuriye mu Karere ka Gatsibo, mu biganiro n’abafatanyabikorwa barimo uruganda Inyange, umushinga SPIU, RDDP na BDF, bigamije kunoza uburyo bafashwa kubona imashini zizinga ubwatsi bw’amatungo no kureba uburyo byakwihutishwa.

Muri iyi nama, uruganda Inyange rwasinyanye amasezerano y’inguzanyo n’Abayobozi b’amakusanyirizo y’amata 11.

Buri Koperative y’aborozi igiye kugura imashini ihinga ikanazinga ubwatsi bw’amatungo, ifite agaciro k’Amafaranga y’u Rwanda 76,500,000, Leta ikaba izatanga Nkunganire ya 50% andi akazishyurwa n’aborozi mu gihe cy’imyaka ibiri.

Amakusanyirizo atanu (5) yo mu Karere ka Nyagatare, atatu mu Karere ka Gatsibo n’andi atatu yo mu Karere ka Kayonza, niyo yasabye iyo nguzanyo akaba ariyo agiye kubimburiye ayandi kubona izo mashini.

Umuyobozi w’ihuriro ry’aborozi mu Karere ka Nyagatare, Kayitare Godfrey, avuga ko izi mashini zizafasha aborozi cyane kuko uretse kuzinga ubwatsi, zizajya zinifashishwa mu guhinga kugira ngo haboneke ubwatsi bwinshi.

Ati “Turizera ko amezi abiri atazagera tutarabona izo mashini zihite zitangira akazi ko kuzinga ubwatsi buhari, ariko zikazanafasha cyane mu gutera ubundi bwinshi kuko zizajya zinahinga.”

Ibiciro byazo ngo bizaba byoroheye buri wese ariko cyane umunyamuryango.