Imbuto itizewe izana n’uburwayi igakurana na bwo

Abitangaje mugihe umuhinzi Bernadette Upfuyisoni wo mu Murenge wa Kiramuruzi mu Karere ka Gatsibo, yahinze amatunda akazamo udukoko bituma yuma atarageza igihe cyo kwera.

Bernadette Upfuyisoni yahinze amatunda ku buso bwa hegitari 2. Nk’uko bitangazwa n’impuguke za RAB zasuye umurima we, ngo basanze harimo indwara zikomoka ku mbuto ndetse no gutegura umurima.

Umukozi wa RAB ushinzwe kurwanya indwara n’ibyonnyi Bahunde Ernest, umwe mu basuye uyu muhinzi, avuga ko indwara yagaragaye mu matunda y’uyu muhinzi ari cyumya yatewe n’uko amatunda atakaragiwe ngo hakurwemo ibyonnyi, imbuto itizewe ndetse n’udusimba twatewe no gukoresha ifumbire y’imborera itaboze.

Ati “Twasanze harimo iminyorogoto. Ubundi si ikibazo mu murima ariko kubera ko izanwa no gukoresha ifumbire itaboze neza, na yo ibona igiti cyaboze imizi ikaba ari ho ijya kwibera kikarushaho kubora. Nanone byagaragaye ko yakoresheje imbuto itizewe kuko yakuranye indwara”.

Bahunde Ernest avuga ko nyuma yo kubona ibi bibazo, basize bagiriye inama uwo muhinzi zirimo kwiyambaza abajyanama b’ubuhinzi, abagoronome ndetse n’abakozi ba RAB.

Kugira ngo uyu muhinzi adahomba burundu ariko nanone, ngo bamusabye kurandura amatunda yamaze kurwara ndetse bakanakoresha imiti irwanya udusimba na cyumya.

Iminyorogoto izanwa mu murima n’imborera itaboze, ikaba yajya mu mizi y’igihingwa cyarwaye (Cyaboze mu mizi)

Agira ati “Mu midugudu haba abajyanama b’ubuhinzi, ikibazo babonye kirara kigeze kure kandi kugikemura biroroha ku buryo umusaruro utabura burundu. Ba agoronome barahari ndetse na RAB. Abahinzi bakwiye kujya batanga amakuru hakiri kare”.

Bahunde arnest asaba abahinzi muri rusange gutegura neza imirima mbere yo gushyiramo imbuto, gutera imbuto zizewe, gukurikiza inama z’abajyanama mu buhinzi no gutanga amakuru hakiri kare, igihe imyaka yabo ihuye n’uburwayi kugira ngo birinde ibihombo.

Ati “Abahinzi bakwiye kwita ku gutegura imirima neza, bagashaka imbuto zizewe hari abazicuruza bemewe na RAB, kuko ntizizana uburwayi kandi zitanga umusaruro. Mu gihe habayeho uburwayi bakwiye no kubivuga hakiri kare tukabatabara ni bo dukorera”.

Ubwo twakoraga iyi nkuru ntitwabashije kubona Upfuyisoni Bernadette nyir’umurima kugira ngo atubwire igihombo yagize, kuko ari mu bitaro arwaye.

MENYA UMWANDITSI

Emmanuel Gasana Sebasaza

Umunyamakuru

@ SEBASAZAGEmman1

Reba inkuru zose nanditse ( 1822 )