Imiryango 60 idakenura abaturage mu mirenge 17 ihakora iki?

Minisitiri w’Ubuhinzi n’Ubworozi, Dr. Gerardine Mukeshimana, avuga ko atabona umumaro w’imiryango 60 itagaragaza impinduka mu mibereho y’abatuye mu mirenge 17 ya Nyamagabe iyo miryango ikoreramo.

Minisitiri w
Minisitiri w’Ubuhinzi n’Ubworozi, Dr. Gerardine Mukeshimana, avuga ko bitumvikana ukuntu imiryango 60 itabasha gufasha abaturage bo mu mirenge 17 kwikura mu bukene

Yabivuze mu nama abayobozi bo mu turere twa Huye, Gisagara, Nyamagabe na Nyaruguru bagiranye na Minisitiri w’Ubutegetsi bw’Igihugu n’uw’Ubuhinzi n’Ubworozi, tariki 11 Ukuboza 2019, i Huye.

Ni nyuma y’uko Umuyobozi w’aka karere, Bonaventure Uwamahoro, yagaragaje ishusho yako agira ati “Mu karere ka Nyamagabe, mu bahatuye ibihumbi 368 n’106, muri bo 52.5% babarirwa mu cyiciro cya mbere n’icya kabiri cy’ubudehe.... dufite n’abafatanyabikorwa bagera kuri 60 tubariyemo n’amadini.”

Umuyobozi w’Akarere ka Huye, Ange Sebutege, na we yari yamaze kuvuga ko muri aka karere ayobora 40.2% by’abahatuye bakennye naho 12.8% bakabaho mu bukene bukabije.

Minisitiri Mukeshimana yagize ati “Iyo miryango ishobora kuba ari yo ibarangaza [ntibikure mu bukene]. Kuki ntashunguramo imfitiye akamaro itamfitiye akamaro nkayihorera?”

“Kuko abaturage bata umwanya muri ibyo. Uzanye miliyoni 10 mu karere akaba umuntu ukomeye cyane w’umufatanyabikorwa, agatwara abaturage buri munsi ngo agiye kubigisha, abaturage bagahora mu nzira bari muri ibyo ngibyo.”

Muri iyi nama hanagaragajwe ko abaturage bo muri Huye, Nyamagabe, Gisagara na Nyaruguru batunzwe ahanini n’ubuhinzi ariko ko hari abatagerwaho n’inyongeramusaruro ku gihe, abandi ntibitabire kuzikoresha.

Abicaye imbere uhereye iburyo ugana ibumoso-umuyobozi w
Abicaye imbere uhereye iburyo ugana ibumoso-umuyobozi w’akarere ka Nyamagabe, uw’aka Huye, uw’aka Nyaruguru n’uw’aka Gisagara

Muri utu turere kandi ngo haracyari n’ibishanga bikeneye gutunganywa nyamara ubusanzwe ari byo bitanga umusaruro mwiza, kuko ababihingamo batozwa kwifashisha inyongeramusaruro bityo bakaba baboneraho no kuzifashisha aho bahinga imusozi.

Nko mu Karere ka Huye hari hegitari 684, i Nyaruguru hakaba 500. Umuyobozi w’Akarere ka Nyamagabe we avuga ko mu byihutirwa gutunganywa muri aka karere harimo igishanga cya Nzavu gifite hegitari 102 cyagombaga kuba cyaratunganyijwe abahinzi bakacyifashisha muri iki gihe cy’ihinga, ariko na n’ubu kikaba kitaratunganywa.

Ku bijyanye no gukoresha ndetse no kugezwaho inyongeramusaruro, Minisitiri w’Ubuhinzi n’Ubworozi, Dr. Gerardine Mukeshimana, yanenze kuba muri utu turere gahunda yo guhuza ubutaka isa n’iyibagiranye nyamara ahanini ari yo ituma hamenyekana mu buryo bworoshye ibikenewe.

MENYA UMWANDITSI

kigalitoday android app mobile

Ibitekerezo   ( 2 )

Buriya rero nureba neza uzasanga amadini anyunyuza abaturage kandi ntacyo yabahaye bakuraho ayo mafranga! Wowe ko ujya gusenga bakakwaka amafranga y’icyacumi, inyubako, amaturo, kugura ibyuma byo murusengero,... Wowe baba baguhaye iki?

Xxx yanditse ku itariki ya: 16-12-2019  →  Musubize

Ariko abantu bagiye bareka gukabya! Minister aragirango abantu bose bahindure domaine d’intervention zabo. Ministere yananiwe no impamvu arashaka kuyegeka ku bandi. Azakore neza ibimureba arebe ko abaturage batazamuka. Abantu baramubwira ihishanga bidatunganije nawe ngo imiryango myinshi. Nareke guhunga ikibazo ahubwo ashake uko yakorana n’iyo miryango imufashe areke kwishongora, guhunga inshingano no kwegeka failure ye ku bandi. Mbese aka bibiliya, nabanze akure umugogo mu josho rye. Si Minagri iherutse gutanga imbuto ya Soya itera aho mu majyepfo. None se abahingiye ubusa yabahaye ingurane? None ngo imiryango myinshi?

Eugene yanditse ku itariki ya: 15-12-2019  →  Musubize

Ohereza igitekerezo

Igitekerezo cyanyu kiragaragara kuri Kigali Today nyuma y'isuzuma kandi mu gihe kidatinze. Udashaka ko izina ryanyu rimenyekana wakoresha alias, Turabashimiye.

Amakuru aheruka